Напис: Весел Мемеди верен на Али Ахмети

Лидерот на НДП, Весел Мемеди, го подржува Али Ахмети за формирање на новата влада, само ако Ахмети влезе во составот на новата влада со заедничката платформа потпишана во Тирана во присуство на Еди Рама.

За Весел Мемеди не е важно кој ќе ја состави новата влада, ВМРО или СДСМ, туку важно е да се оствари заедничката платформа потпишана од албанските лидери.

„Голем дел од албанските политички партии составија заедничка платформа или заедничка изјава околу неопходните потреби на Aлбанците кои мора да се остварат, без разлика кој ќе ја состави новата влада“, пишува Мемеди.

Мемеди, за „Тетовасот“ се изјасни дека стои зад тоа што го изјави вчера на „Фејсбук“, каде што напиша дека овие политички партии на Aлбанците се изјаснија дека ќе им бидат верни на овие принципи, а не на некои други секундарни принципи, и дека ќе го поддржат тоа парламентарно мнозинство што ќе ги прифати овие основни барања на Aлбанците.

„Голем дел од албанските политички партии составија заедничка платформа или  заедничка изјава околу неопходните потреби на Албанците кои мора да се остварат, без разлика кој ќе ја состави новата влада. Овие политички партии на Албанците се изјаснија дека ќе им бидат верни на овие принципи, а не на некои други секундарни принципи, и дека ќе го поддржат тоа парламентарно мнозинство што ќе ги прифати овие основни барања на Албанците. ДУИ и нејзиниот лидер, кој ја презеде одговорноста да ја пренесе оваа платформа до македонската страна, има задача да им даде фидбек на другите албански политички партии околу одговорот на македонската страна во врска со оваа заедничка платформа. Во спротивно, овие албански политички партии не се должни да се придржуваат кон заедничката платформа.

Истовремено, другите албански политички партии, поддржувачи на оваа заедничка платформа, треба да внимаваат како се однесуваат, за да не ѝ дадат причина на ДУИ да не ја почитува заедничката платформа на Албанците. Платформата треба да биде поважна од сè друго!“, напиша Мемеди на својот профил на „Фејсбук“.

Инаку, денеска е последен ден на Никола Груевски како мандатар за составување на новата влада, при што Ахмети го има последниот збор и ако ДУИ не прифаќа да направи коалиција со ВМРО, тогаш мандатот треба да го добие Зоран Заев./ТетоваСот/

[Рецензија: Весел Мемеди верен на Али Ахмети]

Трендот на несовпаѓање на насловот со содржината на написот никако да престане. Обично, постојат две причини поради кои порталите „си поигруваат“ со насловите. Првата причина е за да привлечат читатели кои би го прочитале написот, но честопати уште на самиот почеток го демантираат насловот. Втората причина, пак, е да нападнат или да обвинат без никаква основа една личност, при што насловот им дава простор да го примамат читателот за тој да го прочита написот во кој сè е кажано на бомбастичен, но сепак нејасен начин, колку да се избегне одговорноста.

Линк до оригиналниот напис: „Весел Мемеди верен на Али Ахмети”

Датум и време на објавување: 29.01.2016

Датум на рецензирање: 31.01.2017

Рецензент: Џенис Сулимани

Овој пристап го среќаваме и во рецензираниот текст. „Весел Мемеди верен на Али Ахмети“, пишува во насловот. Уште во првата реченица на написот, пак, стои: „Лидерот на НДП, Весел Мемеди, го поддржува Али Ахмети за формирање на новата влада, само ако Ахмети влезе во составот на новата влада со заедничката платформа потпишана во Тирана во присуство на Еди Рама“. Заклучокот е сосема едноставен. Мемеди е верен на заедничката платформа на албанските партии, а не на Али Ахмети, како што се тврди во насловот. Зборот „ако“ означува условување и не е показател за безусловна верност.

„Голем дел од албанските политички партии составија заедничка платформа, или заедничка изјава околу неопходните потреби на Албанците кои мора да се остварат, без разлика кој ќе ја состави новата влада“, пишува Мемеди.

Освен ова, во продолжение на текстот има потврда од Весел Мемеди, дека стои зад тоа што го напишал пред неколку дена.

„Мемеди, за „Тетовасот“ се изјасни дека стои зад тоа што го изјави вчера на „Фејсбук“, каде што напиша дека овие политички партии на Aлбанците се изјаснија дека ќе им бидат верни на овие принипи, а не на некои други секундарни принципи, и дека ќе го поддржат тоа парламентарно мнозинство што ќе ги прифати овие основни барања на Aлбанците“.

Новинарите не треба да си дозволат да ги толкуваат на еден ваков начин изјавите на политичарите. Нивните изјави треба да се пренесат на точен начин, без да претрпат каква било измена. Новинарот носи одговорност за личните толкувања и треба да се потруди да не ги напише истите во текст од информативна природа.

Кодексот за етика на новинарите и прирачникот за негова употреба, е јасен во оваа насока: (Новинарот) Секогаш треба да се стреми да се задржи оригиналниот контекст на сите цитати или извадоци. Новинарското известување не смее да ја смени смислата на реченицата, изјавата или цитатот.