[Рецензија: СДСМ не сака договор – Заев замина на плажа во Грција]

Ова несомнено е шпекулативен и коментаторски материјал, медиумски производ што не ја крие својата пристрасност и едностран пристап кон политичката ситуација. Желбата е јасна – да се пофали владејачката партија за конструктивност, а да се прекори опозицијата како неволна за компромиси, како размазен политички субјект подготвен само за блокади… Ете го и спин-моментот. Значи, присутни се безмалку сите елементи кои во последниот период ги красат текстовите кои како да се координирани од извесен центар за комуникации.

 Линк до оригиналниот напис: СДСМ не сака договор – Заев замина на плажа во Грција

 Датум и време на објавување: 15.07.2016,  15:54

 Датум на рецензирање: 17.07.2016

 Рецензент: Владимир Мирчески

А КОЈ ПОТВРДИЛ ДЕКА ЗАЕВ СЕ СОНЧА НА ХАЛКИДИКИ?

Кога еден напис располага со многу шпекулации и нагаѓања, а пласирани, демек, како проверени информации, тогаш е тешко да се каже дека вистинитост(а) му е јака страна. Еве, се пласира вест дека лидерот на СДСМ заминал на одмор во Грција. Во ред, да кажеме дека тоа е новост важна за јавноста да ја знае. Но, прашањето е како е таа поткрепена? Нема потврда од кабинетот на Заев, нема потврда од партијата, нема очевидци, нема извори… Со други зборови, нема никаков доказ, што е спротивно на принципите утврдени во Кодексот на новинарите:

Доколку информацијата не може да се потврди или станува збор за претпоставка, односно шпекулација, тоа треба да се каже и да се објави. Точноста на информацијата треба да се провери колку што е тоа можно (член 1).

Не би сакале да веруваме во параноични сценарија дека некои медиуми добиваат полициски билтени на дневна база за тоа кој опозициски челник каде бил и каде ќе оди. За жал, во таа насока одат и дополнителните информации за точната локација на неговиот престој за што Заев, како што се тврди, плаќал по 600 евра на ден. Настрана ваквиот начин на објавување вести, целосно непроверливи, кои се од приватен карактер, ситуацијата дополнително се злоупотребува за да се испорача партиско-политички спин.

„СДСМ не сака договор – Заев замина на плажа во Грција“

„Преговорите се само парада на СДСМ и на соросоидите.“

„СДСМ ниту сака договор, ниту се надева дека ќе биде постигнат.“

ЗА ОБЛЕКАТА И ЗА СУШТИНСКОТО ПРЕГОВАРАЊЕ

Оттука, проблем за преговарачкиот процес е ако, како што се вели, лидерот на опозицијата е надвор од земјата, ама затоа, пак, нема каква било мака доколку во екот на разговорите во Пржино во странство се шета претседателот на владејачката партија. Лошо е ако тоа го прави опозиционерот, ама не и властодржецот. Ептен селективни критериуми има овој текст. Од друга страна, ако недостигаат именувани или релевантни извори како поддршка на главните тези во текстот, тогаш не недостигаат коментари што ја дополнуваат сликата за пристрасност, секако партиска:

„Старата пракса на СДСМ, пред странските дипломати да ветува дека ќе се договори за вонредни избори, а веднаш потоа Заев и Шекеринска да изнесат нови барања кои оневозможуваат договор и избори – продолжува и натаму“.

 

„Шекеринска на преговорите дојде со нова, исклучително скапа брендирана гардероба (што може и да се забележи на фотографијата), додека во Грција веројатно ја чека нејзината јахта со која беше снимена лани“.

Ваквкиот пристап се коси со членот 12 од новинарскиот Кодекс, каде е наведено:

Новинарот треба да прави разлика меѓу фактите и мислењата, меѓу веста и коментарот. 

И, ај што е коментар, ама што е коментар без врска со темата? Каква е релацијата меѓу гардеробата на заменик-претседателката на Заев со текот на преговорите за политичките прашања? Одговорот е –  никаква. Самата констатација повеќе има предзнак на лична пресметка.

Сериозна тема, обработена еднострано, како по нечиј диктат. Текст загубен во лавиринтите на шпекулации и на коментари за грчки плажи, скапи летувалишта и уште помодерна гардероба.