Текст колку да се напише нешто
Објавено во Рецензии
on 24 - 11 - 2015 Автор: Ана Анастасовска
[Рецензија: Социјалните мрежи го избраа најчудното соопштение од СДСМ]
Веќе навикнавме по интернет-порталите да читаме секакви работи што се пласираат како новинарски текстови, а имаат цел само да соберат што е можно повеќе кликнувања и со тоа да ја кренат читаноста на веб-страницата на која се објавени. Таков е примерот и со овој текст, кој не е вест, туку е тенденциозен и политички мотивиран напис.
Линкуван наслов на анализираниот напис: Социјалните мрежи го избраа најчудното соопштение од СДСМ
Датум и време на објавување: 20.11.2015
Датум на рецензирање: 23.11.2015
Рецензент: Ана Анастасовска
Во написот се говори за тоа дека на социјалните мрежи е избрано најчудното соопштение на СДСМ.
„Иако конкуренцијата беше навистина силна социјалните мрежи овие денови го избираа најчудното соопштение од СДСМ. Тоа е соопштението со наслов: „Брзата помош им е потребна на Груевски и Тодоров, ама и таа нема да им помогне“.“
Досега немало избор за најчудно соопштение на политичка партија, па лесно човек може да помисли дека такво нешто се одвивало на социјалните мрежи. Но, кога ќе го прочитате текстот, сфаќате дека таков избор немало никаде. Не е објавено на која социјална мрежа се правел изборот, дали тоа можеби било некаква анкета, кој ја изработил и слично. Многу прашања, ниту еден одговор.
Понатаму, се вели дека за најчудно е прогласено соопштението „Брзата помош им е потребна на Груевски и Тодоров, ама и таа нема да им помогне“. Зошто токму тоа соопштение е најчудно? Го нема текстот на соопштението за да може читателот да се увери во она што авторот на овој неверојатен текст го тврди.
„На социјалните мрежи има коментари од различен карактер, највеќе се присутни оние кои тераат шега со ваквите соопштенија, но има и такви кои искажуваат сериозна загриженост за хаосот и нервозата во опозициските редови.“
Убаво што имало најразлични коментари. Уште да можевме да ги прочитаме и да видиме колку навистина граѓаните „се загрижени за хаосот и нервозата во опозициските редови“.
„За тоа што мисли народот пак се верификуваше со последната анкета на ИРИ, каде ВМРО-ДПМНЕ е со двојна предност пред СДСМ односно рејтингот е 24 % за ВМРО-ДПМНЕ и само 12 за СДСМ. Веројатно ваквото расположение присутно кај граѓаните е изворот на нервозата и фрустрациите во опозициските редови.“
И каква врска има сега ова со „чудното“ соопштение на СДСМ? Ако целта била да се покаже дека власта има поголем рејтинг од опозицијата според ова истражување, тоа требало да се наведе на почеток. Но, овде имаме напис на сосема друга тема, кој нè убедува во нешто, но таквиот навод не го аргументира со ништо, па дури не ни дозволува да го видиме тоа „чудно“ соопштение, туку текстот бара да му веруваме на збор. Зошто би се прикривало таквото „најчудно“ соопштение ако навистина е толку многу „чудно“?
Ова е еден крајно тенденциозен и политички мотивиран текст, кој не содржи во себе никаква, а камоли релевантна и кохерентна аргументација.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
информира
некреативен
несензационален
соодветен
јасен
ФОТОГРАФИЈА
има
соодветна
информира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови