[Рецензија:Грција во паника поради обезбедувањето на границата – бегалците се насочуваат само кон Македонија]

Во опширен текст, без потпис на авторот, пренесен на две страни, а поврзан е со бегалската и со мигрантската криза, нема ни збор за состојбата на луѓето покрај границата, за положбата во која се наоѓаат илјадници мажи, жени деца, кои лежат на железничка пруга, одбиваат храна и хуманитарна помош. Затоа во него има многу навреди, дискредитации, стигматизација, сатанизација, ксенофобија…

Линк до оригиналниот напис: Грција во паника поради обезбедувањето на границата – бегалците се насочуваат само кон Македонија

Датум и време на објавување: 21.11 2015 14:20

Датум на рецензирање: 23.11.2015

Рецензент: Александар Писарев

КОЛАБОРАЦИЈА СО ГРЦИЈА

Централната тема се негативните реакции на грчките медиуми, на европарламентарка Марија Спираки и на грчката опозиција поради затворање на границата за одредени категории мигранти и поставување бодликава жица од наша страна и наводните „реакции “ на „соросовите и опозицски медиуми и невладини организации“, чии ставови се ставаат во негативна конотација и, според авторот, се совпаѓаат или се блиски до грчките, а спротивни на ставовите на актуелната власт.

Иако, реално, за последните случувања на границата, апсолутно немало такви реакции од „опозициските и соровосовите медиуми и од невладините организации“, во текстот тие се обвинети за колаборација со Грција.

„Со речиси идентични критики за одлуката на македонските власти се јавија и проопозициските и соросови медиуми, организации и активисти во Македонија, кои што поставувањето на бодликавата жица го оценија како погрешно и повикаа границата да остане отворена.“

РУСКА ПРУГА

Во понатамошниот текст, кој има елементи и на ксенофобија кон бегалците, нивна стигматизација и сатанизација, медиумот инструментализирано го користи својот простор во функција на поддршка на владината политика, се занимава со интриги и со консктрукции во согласност со дневнополитичките потреби на владејачката партија.

За да ги засили „аргументите“ против опозицијата, против медиумите, кои се критички кон власта, и против Џорџ Сорос, на помош се „повикани“ претставници и експоненти на слични режимски политики во регионот и пошироко, во Унгарија и во Русија, чии ставови кон одредени прашања се осудени од европската и од светската демократска јавност.

„Соросовата машинерија во континуитет се претставува како заштитник на правата на бегалците и мигрантите, обидувајќи се да покажат наводно прекршување од страна на македонските власти, иако според познавачите на состојбите, меѓу кои и рускиот експерт и новинар Андреј Корибко, идеата е оваа категорија на лица да се искористи во престојните нови обиди за предизвикување на обоена револуција во Македонија, во пресрет на предвремените избори во aприл. И унгарскиот премиер Виктор Орбан неодамна го обвини Џорџ Сорос дека е најсилен пример  за оние што поддржуваат сè што ги ослабува националните држави и сè што го менува традиционалниот европски животен стил.“

ЗАКАМУФЛИРАНИ НАМЕРИ

Без ниеден доказ ги сатанизира и ги стигматизира бегалците и мигрантите, критичките медиуми и невладините организации, јасно нагласувајќи дека не дозволува критика на политиката што ја спроведува актуеланта власт.

„Особено се предупредува на фактот што меѓу бегалците има камуфлирани терористи, а постојат верувања дека тие претставуваат најмалку еден процент од вкупниот број на бегалци. Оваа мигрантска инвазија се води од страна на шверцери, а од друга страна од активистите на Џорџ Сорос, кои внимаваат на „човечките права” и прават сè кое што слабее и подкопува дадена држава.“

Суштина на општествената критика е да се изнесе сопственото мислење, но ако е тоа неаргументирано, не нуди подобро решение, не е оперативно, тогаш станува збор за комплетно неаргументитрани обвнувања.

Но, ако, пак, се критикува однесувањето на еден авторитарен режим, без оглед во каква идеолошка матрица е вовлечен, тогаш критиката е вистинскиот застапник на слободата и на демократијата и како новинар се следи сопствената улога во градење на демокртаско и цивилизирано општество, според основните принципи на однесување и според Кодексот на новинарите на Македонија.