Срамна и дрска квазиновинарска фото-вест
Објавено во Рецензии
on 27 - 08 - 2015 Автор: Горан Ризаов
[Рецензија: За Секуловска повикот полицијата да се самоубие е добар графит!]
Македонското квазиновинарство желно за сензација и за кликнувања по секоја цена, веќе одамна не води грижа за вистината, ги меша мислењата и фактите и ладнокрвно повикува на линч на јавни личности. Овој текст, ако може така да се нарече, имајќи предвид дека се состои од наслов, поднаслов и од две-три реченици придружени со фотографија на улична уметност, целосно е базиран на невистини. Неговата цел е, врз основа на неточни претпоставки, да создаде негативни чувства, омраза и бес поради наводниот антидржавен и непатриотски став на новинарката која се дрзнала да објави графит на својот личен фејсбук-профил.
Линк до оригиналниот напис: За Секуловска повикот полицијата да се самоубие е добар графит!
Датум и време на објавување: 23.08.2015, 13:40
Датум на рецензирање: 25.08.2015
Рецензент: Горан Ризаов
Првиот неточен податок е вметнат уште во самиот наслов, каде се манипулира со перцепцијата на читателот дека содржината на еден графит на англиски јазик, фотографиран на непозната локација, се однесува на македонската полиција. Со тоа се сугерира дека новинарката ги повикува полицајците на самоубиство, а потем и дека таа повикала на напад и на убиство над припадниците на МВР. Веќе во поднасловот продолжуваат редовните обвинувања и шпекулации, кои станаа редовен декор на насловните страници и на интернет-порталите на некогаш угледните македонски медиуми. Се вели дека новинарката, која е „блиска до СДСМ“ и „дебело платена од Сорос“, удрила по македонската полиција.
Потоа се цитира содржината на графитот како да е лично напишан од нејзина страна и од напад се преминува во одбрана на активностите на македонските власти и на полицијата, која „изминативе денови им помага на мигрантите и воведува ред при нивниот транспорт“, а воедно и „деноноќно ја чува македонската граница и работи според македонските закони“. Како да е очекувано да не работи според законот и да не ја чува границата. Но, којзнае, можеби некој си ја има мувата на капата. Сето тоа без да се цитира ниту еден извор и без потпис од авторот, кој пишува како да бил на местото на случувањата и известувал од настаните во Гевгелија.
Да биде ситуацијата уште потрагикомична, во самиот текст е прикажан скриншот со фејсбук-коментарите на објавената фотографија од графитот. Во еден од овие коментари, новинарката вели дека не знае каде е фотографиран графитот, но „е добар“. Веднаш потоа, во коментар кој е пренесен и на веб-страницата на дневниот весник „Вечер“, стои одговор од друг фејсбук-корисник дека графитот е хрватски. Медиумот, кој тврди дека за новинарката повикот на самоубиство на полицијата е добар графит, во истиот текст пренесува тврдење дека графитот воопшто не се однесува на македонската полиција, ниту, пак, е фотографиран во Македонија.
Коментирајќи го гестот на постирање фотографија на личен профил на „Фејсбук“, се вели дека новинарката води политичка борба во име на опозицијата, како тоа само по себе да се подразбира. Бидејќи графитот ги поддржува мигрантите? Бидејќи ги напаѓа полицајците? Бидејќи ги повикува туристите да си заминат дома? Опозицијата не го направи ниту едното, ниту другото, ниту третото.
А, иронијата преминува во сакразам кога само со мало пребарување на интернет ќе наидете на фотографија од овој графит објавена уште на 6 јануари 2013 година, на австриската сатирична интернет-страница raketa.at од извесен Мирко Буријан.
Последната реченица во оваа квазиновинарска полуфотовест – полукоментар е, всушност, заклучок даден врз база на комплетна измислица кој ја содржи основната манипулација. Вели „вакви навреди и барање полицајците да се убијат е во најмала рака срамота и дрскост“.
Да, точно, срамота и дрскост во најмала рака е да се објави ваков монструозен текст.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
делумна копија
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
несоодветна
манипулира
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
национална дискриминација, верска дискриминација, политичка дискриминација,
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови