Со сите сили удри по Ванхауте!
Објавено во Рецензии
on 16 - 03 - 2016 Автор: Силвана Жежова[Рецензија: Жесток одговор на провокациите на Ванхојте: Од некогашен олеснувач, до некој кој лае и никој не го сфаќа сериозно]
Текстот што е предмет на оваа рецензија е навредлив и содржи говор полн со омраза кон белгискиот олеснувач Питер Ванхауте. Потпирајќи се само на коментари од граѓани кои, наводно, биле изреволтирани од однесувањето на Ванхауте, написот има цел да ја дискредитира работата на посредникот. Во него воопшто нема ниту образложение за кои провокации на Ванхауте граѓаните, наводно, реагираат, како што е посочено во насловот.
Линк до оригиналниот наслов: Жесток одговор на провокациите на Ванхојте: Од некогашен олеснувач, до некој кој лае и никој не го сфаќа сериозно
Датум и време на објавување: 11.03.2016
Датум на рецензија: 15.03.2016
Рецензент: Силвана Жежова
ТЕКСТ ПОЛН СО ОМРАЗА
При пишување на новинарски текст, една од задачите на новинарот е да знае на какви извори се потпира, колку истите се релевантни, каква е содржината што ја цитира. Доколку навистина се работи за коментари на граѓани, недозволиво е да се пренесуваат ставови во кои има говор на омраза и кои неосновано и без факти се обидуваат да го урнат угледот на една јавна личност, во случајот политичар кој доаѓа од друга држава. Воопшто не е етички, ниту професионално, однесувањето на некој човек да се спореди со однесување на животно.
„Ван Хојте од некогашен олеснувач на меѓународната заедница сега се претвори во една обична џукела. Оди низ улиците во Скопје и лае против ВМРО. Како и на секоја џукела, никој не му се плаши и никој не го сфаќа сериозно, ниту му одговара на празното лаење.“
Понатаму во текстот се дава еден коментар со кој се брани ваквиот став на граѓаните и со кој се зазема страна.
„На граѓаните им е преку глава од дискредитациите, навредувањето и омаловажувањето на овој човек. Затоа тие жестоко му порачуваат да престане да лаже и да го смени неговото однесување бидејќи е непожелен.“
НЕДОЛИЧЕН ГОВОР
Без факти и без аргументи за работата на белгискиот олеснувач Ванхауте, оваа објава е приказна од типот рекла-кажала, напишана со исклучително недоличен речник кој се граничи со примитивизам. Во неа целосно затаиле стандардите на етички исправното новинарство, при што се прекршени повеќе одредби од новинарскиот Кодекс, меѓу кои и членовите 10 и 15:
Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…). (член 10)
Новинарот мора да ја негува културата на говорот и етиката. Неспојливо со новинарската професија е непримерната комуникација со јавноста. (член 15)
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
не може да се утврди веродостојноста на наводите
ИЗВОРИ НА ИНФОРМАЦИИ
има евидентирани извори
неофицијални
нерелевантни
повеќе извори
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
информира
ненаведен автор(извор)
ГОВОР НА ОМРАЗА
навредлив говор
говор на омраза
не потикнува на насилство
дискриминира
политичка дискриминација
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски неуреден
поврзан со тагови