Да се „убие“ гласникот на лошата вест!
Објавено во Рецензии
on 16 - 03 - 2016 Автор: Владимир Мирчески
[Рецензија: Алексов со нова задача од Заев за смислување на алиби за бегство од изборите]
Ова е уште едно во низата клеветнички четива, кое се фокусира исклучиво на една личност наместо на проблемот. Имаме обид за дефокусирање на јавноста на која намерно не ѝ се нуди општата, генералната слика за ситуацијата со избирачкиот список, туку ѝ се продава приказна за наводна ваква или онаква поврзаност на опозицијата, со луѓе од невладиниот сектор кои имаат допирна точка со изборниот процес. Без дилеми, спин!
Линк до оригиналниот напис: Алексов со нова задача од Заев за смислување на алиби за бегство од изборите
Датум и време на објавување: 12.03.2016 15:54
Датум на рецензирање: 15.03.2016
Рецензент: Владимир Мирчески
СПИН-ТЕЗИ
Имаме нови обвинувања на адреса на првиот човек на „Мост“, организација која, меѓу другото, се занимава со изборна проблематика. Заедничка точка со претходните атаци е дека повторно има сериозен недостиг од аргументи и од докази. Отсуството на саглам новинарски алатки се компензира со спин-тези. Зошто е чудно тоа што споменатата личност во својство на директор на „Мост“ ги повика граѓаните да пријавуваат нерегуларности во избирачкиот список?
Па, на Алексов тоа му е работа – на интернет-страницата на оваа граѓанска асоцијација јасно се вели дека нејзина цел е „зајакнување на македонската демократска култура, зголемување на демократскиот капацитет на граѓанските здруженија, институциите и политичките актери…“ Во ова, секако, влегуваат и изборите како еден од врвните принципи на демократијата во секоја нормална земја.
НАКАЛЕМУВАЊЕ
Но, не е неочекувано што неговиот повик веднаш е злоупотребен за да му се накалеми партиско милје – демек тоа го правел по налог на опозицискиот СДСМ. Аха, а каде се фактите за таквото тврдење? Се подразбира дека ги нема, а на сметка на тоа има шпекулации.
„Останува нејасно зошто Алексов излегува со вакво барање, кое е налик барањата и повиците на лидерот на СДСМ, Заев, токму оваа година. Истиот избирачки список се користи десетици години наназад и со него досега се одржале многу парламентарни, локални и претседателски избори. Алексов ниту еднаш досега немаше ништо против избирачкиот список на пример во 2005-та година за локалните избори, во 2006-та или пак во 2002-та година кога на парламентарни избори победи СДСМ.“
Ако некому му е нејасно зошто баш сега, за овие избори се преземаат чекори за расчистување на прашањето за избирачкиот список и зошто сега Дарко Алексов и неговата асоцијација, меѓу другите, повикуваат на конечно затворање на тој проблем, еве ќе наведеме неколку изјави и документи од релевантни меѓународни институции и дипломати кои го велат истото:
…Ревизија на избирачкиот список... (Договорот од Пржино);
…Вклучувајќи мерки што ќе овозможат поголема медиумска слобода, ревидиран избирачки список… (изјава на амбасадата на САД и делегацијата на ЕУ);
…Владејачките партии мора веднаш да преземат сериозни напори за избирачкиот список… (изјава на еврокомесарот Јоханес Хан);
Значи, ова не е прашање што сега, туку-така, му текнало на Алексов да го актуализира, туку е проблем што се провлекува со години и за кој, како никогаш досега, има подготвеност и од домашната јавност и од меѓународната заедница за решавање. Меѓутоа, бидејќи темата некому не му се допаѓа, веднаш се прават напори за нејзино помрачување преку медиумско егзекутирање на тој што ја начнува, во стилот: „Убијте го гласникот што носи лоша вест“!
ОЦРНУВАЊЕ
Во целата приказна се меша сè и сешто, од „политички наредби преку партиски определби, па сè до личен имот и како е тој стекнат“. Реално, во ситуацијата со и околу избирачкиот список, личниот имот на Алексов нема никаква врска. Ако се имаат индиции, докази што укажуваат на незаконитости или, како што се тврди, матни зделки, тогаш има надлежни институции што треба да го проверат тоа. Ама, во целата комплексност на материјата со списокот, дотурање обвинувања за личниот имот на Алексов е само обид за замајување на публиката. Настрана што како извори за тоа што поседува споменатата личност се користат медиуми, и тоа именувани.
Изблиците на пристрасност и тендециозниот пристап се елементите кои веднаш се забележежуваат во текстот, кои на моменти се вкалупуваат и во некакви форми на коментар:
„Се поизвесно е дека Алексов ја исполнува партиската агенда на Заев, се со цел бегство од изборите. Дека за одработка на агендата е финансиски наградуван, пишуваа медиумите, кои открија дека во деловодните книги на МОСТ може да видат 4 милиони евра свртени за неколку години.“
Многу оцрнување, коментари, шпекулации и спин, а премалку вистинско новинарство.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
делумно
делумно
делумно
ИЗВОРИ НА ИНФОРМАЦИИ
има евидентирани извори
официјални, анонимни
релевантни, нерелевантни
не може да се утврди
повеќестрани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
има контекстуални линкови
делумно стилски уреден
поврзан со тагови