Ред изјава, ред прераскажана изјава од Груевски
Објавено во Рецензии
on 22 - 03 - 2016 Автор: Владимир Мирчески
[Рецензија: Разликата е над 3.500 проекти на ВМРО-ДПМНЕ наспроти деструкцијата на СДСМ]
Еднострано, еднострано, еднострано… А, да и сервилност до немај-каде!
Линк до оригиналниот напис: Разликата е над 3.500 проекти на ВМРО-ДПМНЕ наспроти деструкцијата на СДСМ
Датум и време на објавување: 21.03.2016 10:24
Датум на рецензирање: 21.03.2016
Рецензент: Владимир Мирчески
ГРОМОГЛАСЕН АПЛАУЗ ЗА ОТЧЕТОТ НА ВМРО-ДПМНЕ
Четивово е тешко за варење, што поради фалбаџиската содржина, што поради неновинарскиот пристап без грам професионална опсервација, што поради пристрасноста, што поради несоодветните и неизградени коментари… Обидот е да се сублимира (читај пофали), маратонскиот отчет на владејачката ВМРО-ДПМНЕ за сработеното во изминатите години.
Може да се најде разбирање за тој што си го организирал настанот самиот себеси да си дели суперлативи, ама не е нормално еден напис во истиот дух да реди епитети за сметка на власта. Текстот е правен по принципот „ред малтер, ред цигла“, што би значело дел изјава од партискиот шеф, дел прераскажана изјава од шефот, па пак изјава од шефот и ете цврста градба од партиски текст!
И тогаш, што да се забележува за вистинитоста која е ограничена само на рамките на машинеријата за односи со јавноста – тоа што е кажано е пренесено, ама без трошка иницијатива, желба, амбиција за некаква проверка на изнесеното или, пак, набљудување на изјавите низ призма на критичкото новинарско око. Поедноставено, едностраноста е рак-рана на овој текст. Застапена е само позицијата на организаторот на настанот – владејачката партија – и тоа така, како безмалку написот да е учесник во манифестацијата на отчетот. Ако Груевски и тимот околу него кажале дека е остварено, сигурно е така. Џанам, апсолутна вистина!
ДОДАДЕ, ИСТАКНА, ПОДВЛЕЧЕ
Дека на настанот му се приоѓа од понизна позиција, говорат употребените „додаде, потенцира, подвлече“, кои се главните столбови на и она малку текст што не е директен цитат. Затоа, впечатокот е дека генералниот пристап е некако лигав и недостоинстевен за еден медиум и за тоа како би требало да изгледа вистински и објективен новинарски извештај од ваков настан. Атмосферата на додворување е засилена со формулации кои како да сакаат да покажат дека некој е „поголем католик од папата“. Се користат тези кои се посилни и од цитираните изјави на шефот на партијата:
„Проекти, реформи, мерки и дела наспроти деструкција, дивеење и хаос на опозицијата. Ова е пораката која беше испратена синоќа од маратонскиот отчет на владејачката ВМРО-ДПМНЕ кој траеше повеќе од четири часа.
Маратонскиот отчет на партијата на Груевски за сработеното претставува пример на голема транспарентност и отвореност, при што пред 10 илјадна публика и стотици илјади кои можеа да го следат настанот на интернет…“
И насловот е „искован“ во сличен стил: „Разликата е над 3.500 проекти на ВМРО-ДПМНЕ наспроти деструкцијата на СДСМ“.
Прашањето што се наметнува од ваквата конструкција е кој го тврди тоа? Груевски или тој што го креирал написот, зашто како да има заматување на линијата што ги двои настанот и самиот наслов, изгледа како да се преклопуваат еден со друг.
Сè на сè, овој материјал е милина за ушите на организаторот на отчетот!
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
нема мултимедијални елементи
нема контекстуални линкови
делумно стилски уреден
неповрзан со тагови