Рецензија: Заев „испука“ уште една, 12-та „бомба“ за избор на судии
Објавено во Рецензии
on 23 - 03 - 2015 Автор: Владимир Мирчески
Површен текст во кој, претпоставувам намерно, се претрчува преку суштината на настанот што се обработува. Исклучително важна тема, покриена е „наврат-нанос“, со запазување само на формата, а не и на содржината. Отсуство на мноштво неопходни новинарски елемнти, несоодветни компарации и, конечно, пласирани невистини.
Линк до оригиналниот напис: Заев „испука“ уште една, 12-та „бомба“ за избор на судии
Датум и време на објавување: 19.03.2015, 20:59
Датум на рецензирање: 21.03.2015
Рецензент: Владимир Мирчески
СЕЛЕКТИВНОСТ, ПОВРШНОСТ, НЕВИСТИНИТОСТ, ОПТОВАРЕНОСТ СО ПРИСТРАСНОСТ
Впечатокот по читањето на овој кус напис е дека е објавен само за да се брои дека конкретната телевизија ги пренесува прес-конференциите на опозицијата на кои се објавуваат материјали за аферата „Прислушување“. Оттука и претходно споменатиот заклучок за форма пред содржина. Текстот, од професионален аспект, има дупки како „швајцарско сирење“ – недостигаат одговори на основните новинарски прашања, како „што“ и „зошто“. На пример, неразбирливо е да не се каже ниту збор за некои од објавените разговори, за кои и дел од учесниците потврдија дека се веродостојни, а најдиректно го засегаат функционирањето на судскиот систем во земјава. Како тоа да нема каква било новинарска провокација за „прочепкување“ на материјалите што ги обелоденува СДСМ и кои покажуваат целосно поклопување на извршната врз судската власт? Но, не, тоа некому не му било интересно, ама, пак, затоа нè враќа безмалку 20 години назад во минатото за да ни каже како тогашната власт менувала и избирала судии. Чекајте, зборуваме за сегашен настан, за огромен скандал, а не за нешто што се случило во 90-тите години од минатиот век и за што, без да оправдуваме што било и кого било, таа владејачка елита ја платила цената со тоа што на изборите не ја добила довербата на граѓаните. Значи, сегашната ситуација, која покажува невидени размери на судска поврзаност како пајажина, не може и не смее, никако во новинарска смисла, да се оправдува со случувања од минатото.
Дополнително нејасно е што се сакало со интервенцијата дека „јавноста сѐ уште не доби ниту еден телефонски разговор од функционерите на СДСМ, туку повторно на мета на прзентираните снимки беа актуелните министри и државни функционери“. Прво, со ова индиректно се руши претходно пласираната теза за „наводни разговори“, зашто употребената формулација навестува дека станува збор за вистинити разговори. Второ, неточно е дека СДСМ не објавил ниту еден разговор од свои функционери. Да бидеме прецизни, лидерот на опозицијата тоа го стори на 09 февруари 2015 година, на прес-конференцијата на која ја обелодени првата т.н. „бомба“. Значи, слаба вистинитост со силно влијание врз содржината.
Оттука, ако сумираме, произлегува дека станува збор за селективно четиво, со површен пристап, без основен новинарски ангажан, со забележливо неквалитетна суштина, оптоварено со пристрасни елементи, воочливи преку несоодветната компарација сегашност-минато и, секако, формулации кои се невистинити.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
неверодостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
не може да се утврди
изворите се извитоперени
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
најверојатно е оригинал, непотпишан
ненаведен автор
КВАЛИТЕТ НА НАСЛОВОТ
информира
некреативен
сензационален
не целосно
потребно е дообјаснување
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови