Популистичка објава во која нагласено се воздигнува Владата
Објавено во Рецензии
on 17 - 08 - 2015 Автор: Оливера Војновска
[Рецензија: Владата со брзата рекција успеа во рекорден рок да им помогне на луѓето од тетовско]
Ова е уште еден од серијата прилози во кои нагласено се воздигнува Владата. Оваа популистичка објава е обоена со фалбаџиски тон, почнувајќи од самиот наслов, па сѐ до последниот ред.
Линк до оригиналниот напис: Владата со брзата рекција успеа во рекорден рок да им помогне на луѓето од тетовско
Датум и време на објавување: 14.08.2015, 17:33:46
Датум на рецензирање: 15.08.2015
Рецензент: Оливера Војновска
РЕПРИЗИ И ПРОПАГАНДА
Материјалот што го рецензираме се однесува на посетата на премиерот и на дел од членовите на неговиот кабинет на поплавените села во Тетовско (13 август 2015 година), за која медиумот истиот ден информираше во два прилози.
Всушност, овој едностран и исклучително пристрасен напис фактички е реприза на веќе објавените информации. Тој на гледачите не им соопштува ништо ново, туку има цел да ја пофали власта – поточно премиерот, за ангажманот околу справувањето со последиците од поплавите.
Пропагандистичката интонација се забележува на самиот почеток од прилогот:
„Се исчисти голем дел од затрупаните патишта во Шипковица, механизацијата со полна пареа работи во расчистување на урнатите домови и во Речица…
Заврши проценката на штетите, а нивното санирање се одвива според ветеното. Во активностите е вклучен целиот државен врв, а на терен се дејствува интензивно…“
ДОДВОРУВАЊЕ
Фалењето на премиерот е толку нагласено што изгледа како додворување. Во желбата да се истакне неговата улога, употребени се формулации кои изгледаат смешно. Како, на пример, дека Груевски вршел контрола на состојбата на терен, иако тоа воопшто не е задача на претседателот на Владата, туку постојат стручни служби – лица кои се платени за да ја извршуваат таа работа.
Па, правен во таков воспевачки занес, прилогот уште тврди дека:
„…локалното население постојано се заблагодарува за брзата интервенција на надлежните…“
Меѓутоа, во тонските изјавите на тројцата мештани нема такво нешто:
„Моменталната ситуација во селото почна да се стабилизира до некаде, прилично…
… да се санира некоја куќа и тој што има можност побрзо да се врати…
… во моментот се санирани некои дефекти, пример канализацијата и водоводот, ама водата уште не е за пиење…“ (од 0,30 до 0,45 минута од видеото)
Исто така, наспроти наводите дека:
„По десет дена од поплавите во тетовско, животот се враќа во нормала,“
во медиумите може да се прочитаат текстови кои даваат поинаков приказ за сосотојбите на терен и во кои се вели дека процесот на санацијата ќе трае подолго (Шипковица ќе излезе од кал по неколку месеци).
Ама, очигледно, прилогот што е пред нас, воден од идејата да го „овековечи моментот“ за посветеноста на премиерот и за неговото солидаризирање со маката на жителите од Тетовско, не ја видел Шипковица од истиот агол, туку ја следел само визурата на премиерот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
делумно
ИЗВОРИ НА ИНФОРМАЦИИ
има евидентирани извори
официјални, неофицијални
релевантни
повеќе извори
повеќестрани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
нема
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови