Без амбиција да се пренесе точна, непристрасна информација
Објавено во Рецензии
on 8 - 05 - 2015 Автор: Оливера Војновска
[Рецензија: СДСМ и СОРОС ја нападнаа полицијата со шипки и камења – таа ги растера!]
Материјалот што е пред нас е необјективен, тенденциозен и уште со насловот ја дезинформира јавноста дека „СДСМ и СОРОС ја нападнале полицијата со шипки и камења“. И за ваквите тврдења, според веќе востановената практика, не се нудат никакви аргументи. Туку, веста е скроена во познатиот клеветнички манир дека зад секој проблем во државата стојат опозицијата и Фондацијата „Отворено општество Македонија“ (Сорос). Па, излегува дека тие се креатори на незадоволството и подбуцнувачи на тензиите во земјата, а инаку, сѐ е во најдобар ред!
Линк до оригиналниот напис: СДСМ и СОРОС ја нападнаа полицијата со шипки и камења – таа ги растера!
Датум и време на објавување: 05.05.2015, 22:43
Датум на рецензирање: 06.05.2015
Рецензент: Оливера Војновска
А ЗОШТО СЕ ПРОТЕСТИРА?
Станува збор за фотовест која нема амбиција да пренесе точна, непристрасна информација и да им ја долови на читателите атмосферата од протестот пред Владата одржан на 5 мај 2015 година.
Најнапред, во написот воопшто не се кажува зошто се одржува и која е директната причина за протестот. Од него не може да се разбере дека повеќе илјади граѓани се собраа пред Владата по објавувањето на 29. политичка „бомба“, во која беа обелоденети прислушувани разговори кои, според опозицијата, сведочат за „болната вистина за убиството на Мартин Нешковски“.
Имено, неколку часа пред протестот, лидерот на СДСМ, Зоран Заев, презентираше аудиоснимки, кои, како што рече, покажуваат дека власта го прикривала убиството на Нешковски. Според Заев, премиерот, неговиот шеф на кабинет, министерката за внатрешни работи и директорот на УБК, наводно, ја сокриле вистината за смртта на 24-годишното момче, кое беше убиено за време на прославата на победата на ВМРО-ДПМНЕ на парламентарните избори во 2011 година, од припадник на специјалните полициски единици „Тигри“ (Игор Спасов). И тој, кога се случило убиството, наводно, „бил на должност“, а не како што тогаш тврдеше премиерот дека:
„се работи за лице во моментот не било по распоред на службена должност.“
ИСКРИВЕНА СЛИКА
Од друга страна, наспроти наводите во веста дека демонстарнтите се на „СДСМ и СОРОС“, граѓаните се собраа пред Владата со повици на социјалните мрежи „Фејсбук“ и „Твитер“. И, револтирани поради содржината на разговорите, тие бараа одговорност и оставки од премиерот и од министерката за внатрешни работи.
Во однос на тврдењата, пак, изнесени во написот дека демонстрантите, наводно, ја „нападнале полицијата“, повеќе медиуми известија дека тензичната состојба на Илинденска „пукнала“ околу 22 часот, дури откако „полицијата почнала да ја разбива толпата со димни бомби и шмркови“.
Но, материјалот што го рецензираме намерно го изместува тежиштето на настанот, манипулира со вистината и ги прикажува луѓето кои протестираа како насилници, а полицијата како жртва!
Па, веројатно, во прилог на таквата манипулативна улога се отстранети двете фотографии со кои првично беше илустрирана оваа куса вест. И, заменети со нови кои треба дополнително да го засилат впечатокот дека полицајците биле мета на „насилни и алкохолизирани“ демонстранти. При тоа, овој спинерски производ, во кој затаиле новинарските стандарди, создава искривена слика за протестот, која, пак, во целост се совпаѓа со перцепцијата што ја креира власта.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
и точни и неточни
делумно
ИЗВОРИ НА ИНФОРМАЦИИ
има евидентирани извори
неофицијални
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
манипулира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови