Рецензираме еден прилог од кој ништо не е јасно. Медиумот зборува дека: „здружените интелектуалци со отворено писмо до ЕУ и НАТО“…  …„бараат да ги спречат грчките власти од намерата да го искористат претседавањето со советот на ЕУ за свои државни цели“... Многу тешки зборови со ништо неаргументирани. Затоа и го рецензираме прилогот.

Линк до оригиналниот напис: Интелектуалците реагираат на злоупотребата на ЕУ од страна на Венизелос

Датум и време на објавување: 26.01.2014,  16:43

 Датум на рецензирање: 27.01.2014

Рецензент: Александар Писарев

Вистинитост: Во написот ни со еден аргумент не се потврдува веродостојноста на она што е објавено: „Здружените интелектуалци со отворено писмо до ЕУ“. Ако писмото е отворено и ако интелектуалците се здружиле, тоа би требало на некој начин да се докаже и  да им се презентира содржина на писмото на граѓаните. Формулациите се нејасни, па не може да се одреди ни за чии интелектуалци станува збор. Во ТВ прилогот на снимкикте се главно грчките политичари, па се добива погрешен впечаток, а изјавата е на „неименуван“ интелектуалец во чиј лик сите го препознаваат бугарскиот интелектуалец Стефан Мицов Влахов. Изјавата на еден интелектуалец не може да се третира како множина. Наводите во текстот не се вистинити.

Извори на информации: Нема ниеден извор на информации со кој би се докажале тезите изречени во прилогот – дека и нтелектуалците упатиле писмо.

Содржајност: Содржината е нејасна, конфузна и ја збунува публиката, која не може да разбере за што, всушност, се работи и кој протестира до ЕУ. Не е јасно ни на кого интелектуалците треба да му забранат: „лицето на фашизмот во име на Европа да дојде во Македонија“.

Пристрасност: Невешто скриена пристрасност кон владините политики за сите неуспеси на евроатланскиот пат на Македонија да се обвини соседна Грција. Овојпат пристрасноста е завиткана во некаква си обланда на лажно писмо и лажен протест на „здружените интелектуалци“, кои треба да ја спречат Грција во „обидот да разбуди меѓуетнички и граѓански немири во Македонија“.

Оригиналност/Плагијат: Прилогот е оригинално авторско дело со потпис на авторот.

Квалитет на насловот: Некреативен и лажен наслов кој треба убедливо да делува врз читателите, да ги убеди и да ги наведе на  погрешно мислење за да поверуваат во неговото тврдење дека „Интелектуалците реагирале на“…

Фотографија: Фотографијата не е адекватна на содржината. Прилогот зборува за интелектуалците, а на фотографијата го гледаме грчкиот министер за надворешни работи, Евангелос Венизелос. Дали е тој во таа група „здружени интелектуалци“ ?. Зошто немаме фотографија на група „здружени интелектуалци“ или барем факсимил на „упатеното писмо“.

Говор на омраза: Не е експлицитен, но тон се чувствува меѓу редовите на прилогот …„згрозени од последните изјави на грчкиот министер…“  …„ ја злоупотреби функцијата на претседавач“…

Заклучок: Прилогот е направен во моментот кога треба да ги задоволи некои емотивни чувства на поширокиот аудиториум и контекстуално е условен од одредена политичка клима. Притоа е врзан за одреден политички настан „да ги запрат грчките власти во намерата да го искористат претседавањето со советот на ЕУ“.  Влегува во митови и симболи кои се политички инструментализирани за производство на омраза и антипатија према јужниот сосед без да се дистанцира од нив.

Одговорноста на новинарот во овој случај е многу голема. Се повикува на мнозинство, на група „интелектуалците реагираат“…  а во прилогот има изјава само на еден интелектуалец, кој, со оглед на тоа што не е од Македонија, проблемот може да го гледа и на него да регира од дистанца. Ако сакал да каже и да ѝ инпутира на Грција дека, како претседавач на советот на ЕУ, ќе го донесе фашизмот во Македонија, …„и да спречат лицето на фашизмот во името на Европа да дојде во Макеоднија“... тезата е мнгу опасна и контарпродуктивна за европскиот пат на Македонија, воедно е и навреда за ЕУ и за претседавачот на Советот на ЕУ во наредните шест месеци. Сé тоа вкупно може да има понатамошни многу негативни импликации по евроатланските перспективи на Македонија.

Згора на тоа, написот со никакви факти не е потврден. Не е е вистинит. Граѓаните се изманипулирани со лажни конструкции дека, ете, интелектуалната елита реагирала. Тоа не е точно, или барем од овој напис не можеме да бидеме сигурни дека се случило.

Не е испочитуван член 1. од Кодексот на новинарите на Македонија.

Член 1.

Новинарот треба да објавува точни, проверени информации и нема да прикрива суштински податоци и да фалсификува документи.