Сечење, лепење и монтирање изјави
Објавено во Рецензии
on 8 - 04 - 2016 Автор: Александар Писарев[Рецензија: Бејли и Орав: Изборите на 5 – ти јуни ќе се одржат]
Кодексот на новинарите на Македонија во основните принципи на однесување предупредува дека новинарот треба да го почитува плурализмот на идеи и на ставови, а во првиот член вели дека треба да објавува точни, проверени информации и нема да прикрива суштински податоци и да фалсификува документи.
Зошто текстот што го рецензираме почнува со одредбите на Кодексот, кои обично ги ставаме на крајот? Затоа што овој текст е груба манипулација со интервјуто со амбасадорот на САД, Џес Бејли, и на амбасадорот на ЕУ, Аиво Орав, пред сè во насловот „Бејли и Орав: Изборите на 5 – ти јуни ќе се одржат“.
Ако се спореди напишаното и она што амбасадорите го кажале, очигледно е дека оваа конструкција не кореспондира со вистината.
Линк до оригиналниот напис: Бејли и Орав: Изборите на 5 – ти јуни ќе се одржат
Датум и време на објавување: 04.04.2016 19:53
Датум на рецензирање: 07.04.2016
Рецензент: Александар Писарев
СЕЧЕНО ЛЕПЕНО И МОНТИРАНО
Текстот прави манипулација и на читателите им пренесува „ставови“ на амбасадорите – коишто тие не ги кажале! Фалисфикува факти и објавува невистина, за наводните изјави на амбасадорите да кореспондират со ставот на актуелната власт и со политиката што ја брани медиумот.
Дали овој цитат кореспондира со она што го кажал Аиво Орав во врска со изборите?
„Сите политички партии се изјаснија дека се подготвени за избори на 5 – ти јуни. Овие избори ќе донесат некои избори во процесот, но на крај датумот на изборите може да го смени само собранието.“
Но, Аиво Орав вели:
„По одложувањето на изборите за 5 јуни забележан е важен напредок во поглед на избирачкиот список и работата на ДИК, се вршат теренски проверки… дали некои имиња може да се избришат од списокот, тоа е сложено техничко прашање и народот има право на жалба ако смета дека има грешки…. тие грешки треба да се исправат до 6 јуни или кога и да се одржат избори, сепак има уште прашања во овој процес, тие прашања треба да ги поставува и народот и собранието и партите зашто сепак од нив зависи одлуката за датум на изборите.“
БЕЈЛИ И ОРАВ ТОА НЕ ГО ЗАСЛУЖИЛЕ
Во следниот акцент, кој се однесува на Договорот од Пржино, уште повеќе се извртени фактите и невистинито се пренесени зборовите на амбасадорот на ЕУ, Аиво Орав. Во врска со Договорот од Пржино, Орав во интервјуто вели:
„Договорот од Пржино и неговата имплементација се соочуват со големи проблеми. Политичките лидери имат големи тешкотии во негово спроведување. Има проблеми и специјалниот обвинител и сметам дека нејзината институција треба да има целосна подршка од сите политички партии и од сите државни институции.“
На читателите им е пласирано нешто сосема друго:
„Договорот од Пржино се спроведува во сите негови делови. Со веродостојните избори ќе биде пратена порака дека Македонија е на добар пат кон Европската унија, велат амбасадорите на САД и на ЕУ , Џес Бејли и Аиво Орав во ексклузивно интервју за Канал 5.“
Важен дел од интервјуто кој се однесува на медиумите и негативната оценка е со умисла исфрлен од текстот. Во тој дел амбасадорите посебно предупредуваат на овој многу важен дел од Договорот од Пржино.
Да не навлегуваме во тоа дали случајно или намерно и дали под нечие влијание, текстот на интервјуто е цензуриран, сечен и лепен. Ќе повториме само дека Кодексот на новинарите на Македонија вели: „Основна задача на новинарите е да ја почитуват вистината и правото на јавноста да биде информирана. Право и должност на новинарите е да ја спречат цензурата и да го спречат искривување на вестите“.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
официјални
релевантни,
2 извори
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор, ненаведен автор
КВАЛИТЕТ НА НАСЛОВОТ
дезинформира
некреативен
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
квалитетни мултимедијални елементи
нема контекстуални линкови
стилски уреден
неповрзан со тагови