[Рецензија: Партизација наместо светска акредитација: Жерновски подготвува „партиско уништување“ на ОУ “Кирил и Методиј“?]

Ова е еден нецелосен и едностран текст, кој во себе не содржи никакви извори, ниту изјави од засегнати страни. Написот единствено содржи обвинувања упатени на сметка на градоначалникот на Центар, Андреј Жерновски. Но, таквите обвинувања не се поткрепени со ништо, поради што се доведува во прашање нивната веродостојност.

Линкуван наслов на анализираниот напис: Партизација наместо светска акредитација: Жерновски подготвува „партиско уништување“ на ОУ “Кирил и Методиј“?

Датум и време на објавување: 30.08.2016

Датум на рецензирање: 08.09.2016

Рецензент: Ана Анастасовска

Уште во самиот наслов и на почетокот од текстот може да се препознае интенцијата на овој новинарски прозивод, а тоа е да се обвини првиот човек на Центар дека сакал да го партизира, а со тоа и да го уништи ОУ „Кирил и Методиј“.

„Едно од најугледните училишта во општина Центар, основното “Св. Кирил и Методиј“ продолжува да биде мета на политичките игри и обиди за брутална партизација од страна на градоначалникот на општината Андреј Жерновски“.

Ова е веста, а кога има вест, професионално е таа да биде убаво поткрепена и проверена од неколку страни. Но, тоа не е случајот во овој новинарски напис.

„Неколкумина наставници ги очекува отказ од работа. Жерновски не планира да им ги продолжи договорите, иако тие, како и сите 50 наставници во училиштето се добро обучени и веќе 3 години по ред ја имплементираат престижната наставна ИБ програма во ова училиште. За нивната обука Министерството за образование и наука инвестираше повеќе од 150 илјади долари, а со одлуката која ја подготвува Жерновски се подготвува „крах“ на оваа програма која нема да може да се одвива без професори со соодветна обука“.

Прво, се обвинува Жерновски дека ќе отпушти неколкумина наставници, обучени за некаква ИБ-програма во ова училиште и второ, дека со тоа се подготвувал крах на таквата програма за која МОН инвестирало 150.000 долари.

Да тргнеме со ред. Во текстот нема изјава од ниту еден наставник кому му се заканува отпуштање од работа, макар да биде тоа и анонимна изјава. Нема изјава од директорот на училиштето, ниту, пак, има став од директно посочениот виновник, Жерновски. Потврда за обвинувањата нема од ниту една страна, што значи дека тие може и да не се веродостојни, односно да се измислени.

Понатаму, се спомнува некаква ИБ-програма која се спроведувала во училиштето, но не е е јасно за каква програма станува збор, ниту, пак, е објаснето што значи кратенката „ИБ“.

„Очигледно е дека за Жерновски реномираната ИБ-програма и не е некој престиж, иако центарското “Кирил и Методиј“, заедно со училиштето “Браќа Миладиновци“ во Аеродром, се единствените две во државата кои во моментов ја имаат привилегијата бесплатно да ја применуваат ИБ програмата, затоа што трошоците во целост ги покрива централната власт. За споредба, во други држави родителите плаќаат солидни суми на пари за нивните деца да учат по оваа програма која ја поттикнува креативноста, го буди критичкиот ум кај учениците и е призната од врвни светски стручњаци во образованието, со децении наназад“.

Зошто оваа програма е реномирана и зошто во други земји родителите плаќале солидни суми за децата да им учат по оваа програма? Кои се тие солидни суми? Ништо во врска со оваа програма не е објаснето ниту, пак, читателот е информиран каде се применува таа.

Ова е еден нецелосен и едностран текст, кој во себе не содржи никакви извори, ниту изјави од засегнати страни. Написот е очигледно политички мотивиран, бидејќи единствено содржи обвинувања упатени на сметка на градоначалникот на Центар.