Интервју на Зекири извадено од контекст
Објавено во Рецензии
on 22 - 12 - 2016 Автор: Димитар Тануров
[Рецензија: Зекири отворено му се закани на Заев: Не се ангажирав за да не се спроведе двојазичноста!]
Текстот е класичен пример за вадење изјави од контекст и за правење спин кој има цел да прикаже слика што кореспондира со перцепцијата на владејачката ВМРО-ДПМНЕ. Во него се грубо прекршени стандардите на професионално исправното новинарство, кои подразбираат дека основна задача на новинарите е да ја почитуваат вистината и при пренесувањето на информациите да бидат чесни, објективни и точни.
Линк до оригиналниот напис: Зекири отворено му се закани на Заев: Не се ангажирав за да не се спроведе двојазичноста!
Датум и време на објавување: 13.12. 2016
Датум на рецензирање: 21. 12. 2016
Рецензент: Димитар Тануров
МАНИПУЛИРАЊЕ
Насловот: „Зекири отворено му се закани на Заев: Не се ангажирав за да не се спроведе двојазичноста!“, е сензационален и претставува слободно толкување на делови од интервјуто на поранешниот новинар и иден пратеник на СДСМ, Мухамед Зекири, за агенцијата „Анадолија“. Уште тука се наѕираат спинувачките елементи што следуваат во текстот.
„Членот на Извршниот и Централниот одбор на СДСМ, Мухамед Зекири, вели дека двојазичноста што ја ветува опозицискиот лидер Зоран Заев не е трик за привлекување на гласовите на Албанците“.
Во главата на веста се манипулира со изјава од споменатото интервју на Зекири, која е извадена од контекст за да се поентира дека тврдењата на владејачката партија за време на предизборната кампања (дека Заев, наводно, се залагал за „двојазичност на цела територија“) се вистинити. Всушност, овој фрагмент од интервјуто на Зекири следува по неговиот исказ дека станува збор за права кои се загарантирани со Уставот, а не некои нови права, како што алудира спинуваниот текст.
„Во однос на предизборните ветувања на претседателот на СДСМ, Зоран Заев, за фер земја каде што Албанците ќе ги имаат правата загарантирани со Устав, како што е употребата на јазикот, Зекири е убеден дека тие не се трик за привлекување на гласовите и дека тој ќе биде силен глас на Албанците во СДСМ“.
ВИРТУЕЛНИ АНАЛИТИЧАРИ
На крајот на текстот се вели дека „аналитичарите коментираат“, но никаде не се посочува кои се тие аналитичари, ниту со име и презиме или барем нивно професионално лоцирање. Ваквите фрази најчесто се користат за затскривање лични ставови и за поентирање. Тоа може да се заклучи и од последната реченица, во која се вели дека партијата „давала“ донации по џамии, но за ваквите тврдења нема изнесено ниту извор, ниту потврда, туку се затскрива под терминот „неофицијални“. И во вакви случаи, изворот мора да биде барем лоциран, доколку сака да биде анонимен или, пак, не сака официјално да ги презентира податоците. Во вакви случаи неофицијалните информации мора да се истражат и да се докажат пред да бидат објавени.
Вака составениот напис е во спротивност со принципите утврдени во Кодексот на новинарите кој, меѓу другото, налага дека новинарот треба да објавува точни, проверени информации и да не прикрива суштински податоци, да го назначи изворот на информациите, да прави разлика меѓу фактите и мислењата, меѓу веста и коментарот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални, анонимни
релевантни, нерелевантни
повеќе извори
повеќестрани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор, наведен извор без линк
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
национална дискриминација, политичка дискриминација
УРЕДЕН ЗА ВЕБ
читлив
нема мултимедијални елементи
нема контекстуални линкови
стилски уреден
поврзан со тагови