Црвен картон за домашна реплика на странски текст
Објавено во Рецензии
on 20 - 11 - 2015 Автор: Владимир Мирчески
[Рецензија: ПУТИН ГО ИЗВРШИ НАЈГОЛЕМИОТ ВОЗДУШЕН НАПАД ВО МОДЕРНАТА ИСТОРИЈА]
Ова е брз текст. Набрзина и лошо преземен, сплескан уште побрзо и туку-така залепен на интернет. Не само што е пример за copy-paste и најверојатно google translate новинарство, туку и за неквалитетно практицирање на ова копирачко новинарство.
Линк до оригиналниот напис: ПУТИН ГО ИЗВРШИ НАЈГОЛЕМИОТ ВОЗДУШЕН НАПАД ВО МОДЕРНАТА ИСТОРИЈА
Датум и време на објавување: 18.11.2015 12:47
Датум на рецензирање: 19.11.2015
Рецензент: Владимир Мирчески
Написов е тешка копија. Не сметам дека и оригиналот е некое особено „парче“ материјал, но секако е каде-каде подобро од неговата реплика. Прво, македонската верзија прави недозволива грешка од аспект на фото-илустрација. НЕ СМЕЕ напис во кој се опишува, а делумно и воспева, руската воздушна интервенција во Сирија да се „покрива“ со фотографија од американски авиони. Б-52, Б-1 и Б-2 се заштитен знак на стратешките воздухопловни сили на САД. Тоа оддалеку се гледа, што, пак, навестува дека оној кој го копирал текстот нема абер од темата за која зборува, зашто во оригиналот јасно се наведени руските модели кои учествувале во големиот напад. Замената на фотографиите предизвикува забуна кај читателите кои може да помислат дека станува збор за заедничката руско-американска воздушна операција. А, тоа не е така.
Второ, кога текстот е „краден“, така велам зашто не е наведено од каде се цитирани наводите, тоа е правено на многу несреден начин. Се тврди дека е срамнет со земја главниот град на ИД, а притоа не е наведено кој. Што треба да прават тие што читаат, да го бараат од други извори името на главното исламистичко упориште во Сирија?! А, тоа е Рака. Понатаму, стои дека градот, кажавме дека е безимен, бил девастиран, но тоа не е точно. Информациите на релевантни организации велат дека во неколкудневните воздушни напади врз Рака, која е цел не само на руското, туку и на француското воздухопловство, загинале 33 исламисти. Дел од анализите се дека бомбардирањето не само што не нанело огромни штети, туку и дека многу не го изместило секојдневното функционирање во градот. Ваквите информации укажуваат на тоа дека Рака сигурно не е срамнет со земја како што сензационалистички се тврди.
Интересна е и контардикторноста што се забележува на едно место – во еден пасус се фали дека руските сили ги „растураат“ исламистите за потоа да се каже дека:
….фактите велат дека многу од руските воздушни напади погодиле бунтовнички групи кои се против сирискиот претседател Башар ал-Асад и ИСИС.
Што вели еден мој колега, пример за contradictio in adjecto или контрадикции во сегментите на аргументот.
Нервира и непотребното преувеличување во насловната конструкција: „ПУТИН ГО ИЗВРШИ НАЈГОЛЕМИОТ ВОЗДУШЕН НАПАД ВО МОДЕРНАТА ИСТОРИЈА“, зашто временски не е баш најпрецизно тврдење. Според некои дефиниции модерното време стартува од 16 век. Оттука ако се знае обемот на воздушни напади извршени во Втората светска војна со стотици авиони, насловот е во најмала рака претенциозен. Затоа, ќе кажеме дека оригиналниот напис искористил многу посоодветен термин најголемиот напад на бомбардери во последните декади.
Имаме многу лошо копирање и пример што се добива кога несоодветно ќе се измешаат избрзување, непознавање и неквалитетно преведување – медиумски бучкуруш за црвен картон.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
неверодостојни наводи
ИЗВОРИ НА ИНФОРМАЦИИ
има евидентирани извори
официјални, анонимни
не може да се утврди
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
нема извртување на вистина (спин)
наклонетост
друга пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
целосна копија
наведен автор
КВАЛИТЕТ НА НАСЛОВОТ
не информира
некреативен
сензационален
несоодветен
нејасен
ФОТОГРАФИЈА
има
несоодветна
манипулира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови