Напис: Исчезнаа канделабрите од 100 илјади евра од мостот „Мајка Тереза“

Скопје, 20 декември – Канделабрите на мостот Мајка Тереза кај Академијата за образование и наука, кои беа поставени на почетокот од оваа година, исчезнале, според тоа што може да се види на фотографиите, информира „Журнал“.

Во јануари оваа година, кога се менуваа старите канделабри, од Град Скопје беше дадено објаснување дека постојните не се ниту расипани, ниту уништени, туку, едноставно за да се постигне еден поосветлен амбиент, тие се сменети.

Медиумите тогаш известија дека за новите канделабри се дадени 100 илјади евра како што беше наведено во огласот за тендер за јавно осветлување.

[Рецензија: Исчезнаа канделабрите од 100 илјади евра од мостот „Мајка Тереза“]

Да се рече „опа“ без да се направи – скок! Или, пак, од новинарска гледна точка, да се напише вест без да се соберат сите информации и да се проверат засегнатите страни. Текстот што го рецензираме можеби е од јавен интерес, но не е напишан за целосно информирање на јавноста. Ова го кажуваме имајќи предвид дека не е испочитувано начелото за балансирано информирање, односно не е побаран став од надлежните страни. Поради ова, сметаме дека оваа вест е некомплетна.

„Канделабрите на мостот Мајка Тереза кај Академијата за образование и наука, кои беа поставени на почетокот од оваа година, исчезнале, според тоа што може да се види на фотографиите, информира ’Журнал’“.

 

Линк до оригиналниот напис: „Исчезнаа канделабрите од 100 илјади евра од мостот „Мајка Тереза“”

Датум и време на објавување: 20.12.2016

Датум на рецензирање: 21.12.2016

Рецензент: Адриан Керими

Веста е напишана врз основа на само една фотографија која го нема потребниот квалитет и не дава точно објаснување за местото за кое се зборува во текстот. Оваа аматерска снимка е употребена колку да се состават неколку реченици, во овој случај – да се напише една вест, која не информира на правилен начин.

„Во јануари оваа година, кога се менуваа старите канделабри, од Град Скопје беше дадено објаснување дека постојните не се ниту расипани, ниту уништени, туку, едноставно за да се постигне еден поосветлен амбиент, тие се сменети“.

Во текстот е спомнат и Град Скопје, но, за жал, новинарот не се потрудил да пренесе и став од надлежните лица на Град Скопје за да објаснат или, пак, да изнесат свои ставови за спомнатите проблеми. Во ниеден дел од текстот не се покажува дали новинарот бил на местото на настанот или, пак, веста ја напишал без да го посети теренот, туку едноставно зел фотографија направена од некој читател или обичен граѓанин кој побарал помош за овој проблем. Со овој текст редакцијата не ја завршила докрај својата задача и улога.

„Медиумите тогаш известија дека за новите канделабри се дадени 100 илјади евра како што беше наведено во огласот за тендер за јавно осветлување“.

Од овој пасус се гледа дека текстот има и заднина во врска со темата за која се пишува, но нема содржина. Се спомнува цената на осветлувањето на мостот Мајка Тереза, но не се дадени детали околу тоа кога е завршено осветлувањето на овој мост и дали во буџетот за 2016 година се предвидени средства за негово одржување.

Освен од професионален аспект, текстот изобилува со бројни други големи грешки. Македонската академија на науките и уметностите е наречена Академија за образование и наука, а во текстот се употребени и поими кои се вметнати како последица на технички грешки и правописни грешки, било да се тоа од аспект на структурата на речениците или, пак, од стилски аспект.