Нагласено тенденциозен текст кој отвора генерално прашање – имаат ли право членовите на опозицијата, новинарите што ја поддржуваат опозицијата, симпатизерите и членовите на нивните семејства да користат или да учествуваат во трошењето и во поделбата на јавни пари, во овој случај за издавачка дејност.

Од неколку издавачки проекти на „Магор“ кои ги финансирало Министерството за култура, издвоен е само еден, оној со кој е дадена поддршката за печатење на романот „Смрта на уметноста“ на Костадин Героски. Неговата „вина“ е само во тоа што е син на новинарот Бранко Героски.

Линк до оригиналниот напис: „Режимот“ финансиски го поддржува синот на Бранко Героски

Датум и време на објавување: 12.12.2014, 14:48

Датум на рецензирање: 13.12.2014

Рецензент: Александар Писарев

ДИСКРИМИНАЦИЈА

Намерата е јасна и очигледна и носи порака, дека тие што ја критикуваат власта не би требало да учествуваат во користењето и во трошењето на јавните пари.

„За оваа цел, авторот од „фашистичкото“ министерство добил 143.000 денари. Но, кога станува збор за пари, очигледно кај најгласниот опозициски новинар сите врати се отворени.“

Ако од буџетот во кој партиципираат сите граѓани на Македонија како даночни обврзници без оглед на нивното политичко определување, парите треба да се дават само на членовите, симпатизерите и на поддржувачите на владејачката партија и на нејзината политика, тогаш се заговара сериозна дискриминација заснована врз политичко определување.

А, ако „промена на ставот кон одредените политики“ на власта се поврзува со парите, како што се сугерира, тогаш власта отворено испраќа порака дека може „секого да корумпира“.

„Не навлегувајќи во вредноста на ова уметничко дело, за што  без сомнение веројатно има подлога штом добива пари од државно министерство, се поставува прашањето како толку брзо Героски ги погазува сите досега изнесени ставови околу криминалот што наводно го правело ова министерство, особено со проектот „Скопје 2014“, а сега, кога неговиот син добива пари оттаму, се е добро и беспрекорно, и се разбира, парите се дадени на вистинскиот автор?“

„ЦРНА ОВЦА“

Поради опозициските ставови на неговиот татко, еден млад книжевник се обележува, станува „црна овца“, бидејќи неговото авторство е финансирано од државната каса, тоа се гледа и од насловот („Режимот“ финансиски го поддржа синот на Бранко Героски).

Оној кој не знае може да помисли дека следниот цитат се однесува на младиот автор на романот, иако, колку што е познато, тој никогаш не изјавил дека министерството е фашистичко.

„Опозициските пера, кои ја користат секоја можност да ја оцрнат власта како фашистичка и недемократка, сепак, одат против своите принципи (ако воопшто ги имаат), и немаат ништо против кога овој „режим“ финансира нешто што е нивни личен интерес.“

 

ЛЕПЕЊЕ ЕТИКЕТИ

Рефлексно се исмејува опозицискиот новинар, му се лепи партиска етикета и се прикажува во негативна стереотипизација како превртлив среброљубец, кој за едно спонзорство го сменил политичкото убедување.

„Имено, раководителот на опозицискиот портал „Плусинфо“ и главен уредник на СДСМ-овското гласило „Слободен печат“, Бранко Героски, за кого оваа власт треба да падне по секоја цена, веројатно за првпат е на иста бранова дожина со Министертсвото за култура, кое го спонзорира издавањето на книгата на неговиот син, Костадин Героски.“

ДО ЕДНОУМИЕ СО ПАРИ

Се заговара едноумие за финансиска добивка од јавните пари кои им припаѓаат на сите граѓани како даночни обврзници. Тоа е спротивно и на основните принципи на однесување на новинарите кои произлегуваат од Кодексот на новинарите на Македонија, кој вели:

Новинарите, следејќи ја својата улога во градење демократијата и цивилното општество, меѓу другото ќе го почитуваат плурализмот на идеите и ставовите, ќе придонесуваат во јакнењето на правната држава и во контролата на власта и на другите субјекти во јавнит живот.

Повреден е и членот 14 на Кодексот кој вели дека:

Новинарот мора да обезбеди професионална дистанца од политичките субјекти.

Во кодексот на принципи на однесување на новинарите на Меѓународната федерација на новинари пишува:

Новинарите треба да се свесни за опасноста од поттикнување дискриминација преку медиумите заснована врз раса, пол, политичко или друго мислење и општествено потекло…