Рецензија: Принцот Чарлс од Камила: „Пијаницо, од тебе нема да биде кралица“!
Објавено во Рецензии
on 6 - 06 - 2014 Автор: Владимир МирческиНавидум „лесно-забавно“ четиво, барем за македонската публика, бидејќи се занимава со англиската кралска палата, ама испаѓа дека е проблематичен текст и тоа од неколку причини. Накусо да ги наброиме: нема кога, нема каде, а секако нема ниту извор за една ваква сериозна информација која се потпира на „некојси“ од Бакингемската палата.
Линк до оригиналниот напис: Принцот Чарлс од Камила: „Пијаницо, од тебе нема да биде кралица“!
Датум и време на објавување: 01.06.2014, 02:18
Датум на рецензирање: 03.06.2014
Рецензент: Владимир Мирчески
БАКИНГЕМСКАТА ПАЛАТА НЕ Е ИСТО ШТО И ШОУТО НА „КАРДАШИЈАНОВИ“
Ако нам, зборувам за домашната публика, вестите од кралската палата во Лондон повеќе ни наликуваат на чист show-biz, верувајте тоа не е така во останатите европски земји, секако не во Велика Британија или, пак, САД. Во пренесувањето на информациите поврзани со „Семејството од Виндзор“ релевантните медиуми покажуваат голема доза на внимателност и чувство за значењето и тежината на оваа кралска фамилија, бидејќи, сепак, станува збор за една од најстарите светски монархии, а не за реалити шоу од типот на „Keeping Up with the Kardashians“. Е, токму таков пристап се забележува во овој текст. Поточно имаме „рекла-казала“ напис. Видете, не велам дека можеби не се случило принцот Чарлс да ѝ префрли на сопругата дека премногу пие, но во овој случај тоа ни е пренесено речиси како од прва рака. Човек дури и да се замисли за можноста македонски интернет портал да има свои извори во палатата?!
Потоа, немаме јасна локализација каде се случил тој иницидент, кога бил настанот, дали расправијата била пред други луѓе… Значи, имаме информација која не ги исполнува основните елементи на една вест.
Конечно, доаѓаме до најголемиот проблем – отсуството на извори. Јасно е дека најверојатно станува збор за преземена информација, но никаде не е наведено од каде. Имаме цитати, би се оградил и би рекол наводни, и од принцот и од неговата сопруга, ама без нивно прецизно лоцирање или повикување кога и каде тоа го кажале. Прашањето е врз основа на што да веруваме во понуденото – на извори на македонски портал во англиското кралско семејстов? Смешно!
ПРИМЕР ЗА ЛОШО „COPY-PASTE“ НОВИНАРСТВО
Оттука, содржината е јасно таблоидска и ептен „жолта“, но иако ја сместуваме во таков жанр, сепак треба да се потенцира дека е непотполна. Некој како да почнал нешто да пишува, ама работата не ја завршил до крај. Поточно, неизбежно е чувството дека имаме работа со copy-paste текст, но и тоа „копирање и пејстирање“ е направено исклучително лошо, а пак да не зборуваме што и не е наведено од каде е „позајмен“ материјалот, кој, вака прераскажан, не е ниту соодветно потпишан – само име без презиме!
Насловот Принцот Чарлс од Камила:„Пијаницо, од тебе нема да биде кралица“! ја најавува силната таблоидската жица на содржината.
На крај, од приложеното лесно се доаѓа до заклучокот дека овој текст не е авторски, туку од некаде земен, но несоодветно пренесен со непочитување на низа новинарски правила. Едноставно кажано – лошо.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
не се знае
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
не може да се утврди
не може да се утврди
не аплиактивно
КОМЕНТИРАЊЕ
нема коментаторски елементи
ПЛАГИЈАТ
најверојатно копија
ненаведен автор
КВАЛИТЕТ НА НАСЛОВОТ
не информира
некреативен
сензационален
нејасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
неквалитетни мултимедијални елементи
нема контекстуални линкови
стилски неуреден
неповрзан со тагови