Една запирка – милијарди број
Објавено во Рецензии
on 20 - 08 - 2015 Автор: Владимир Мирчески
[Рецензија: Грција продаде 14 регионални аеродроми]
Имаме текст со сериозен пропуст. Наведените податоци не одговараат на фактичката ситуација со што публиката е дезинформирана за многу милијарди евра. Ова е пример за тоа како „малку недостига за многу да се згреши“.
Линк до оригиналниот напис: Грција продаде 14 регионални аеродроми
Датум и време на објавување: 18.08.2015, 13:24
Датум на рецензирање: 19.08.2015
Рецензент: Владимир Мирчески
Неверојатно е колку малку треба во новинарството за да се направи сериозна грешка. Во овој случај тоа е една запирка ставена на лошо место во лошо време. Станува збор за легитимна информација – грчката влада, притисната од неповолната финансиска ситуација, дава под концесија 14 регионални аеродроми на германска компанија. Тука нема каков било проблем. Недостатокот, од новинарски аспект, се појавува во делот на парите, кои официјална Атина треба да ги инкасира од новиот оператор на овие аеродроми. Овој текст тврди дека во прашање се 12,3 милијарди евра што, ако подобро се размисли, е навистина висока сума имајќи предвид дека се работи за аердроми, пред сè, ситуирани на острови кои имаат поголем сообраќај само во текот на туристичката сезона. Но, внимателното око на наш читател, како и неговото двојно проверување, забележа дека „кваката“ е во тоа што е направена утка во позиционирањето на запирката во износот што Германците ќе им го платат на Грците за долгогодишното отстапување на аеродромите. Имено, конзорциумот „Фрапорт Слентел“ (Fraport-Slentel) за зделката ќе исплати 1,23 милијарди евра, а не 12,3 милијарди евра како што нè „информира“ овој напис. Има разлика, нели, и тоа во цели 11,07 милијарди евра. Верувам дека станува збор за ненамерна, ама сепак е сериозна грешка.
Новинарот треба да објавува точни, проверени информации… – член 1 од Кодексот на новинари.
Проблемот станува уште поголем зашто оваа вест е објавена од државната новинска агенција и потоа, со нејзината фелеричност, како таква е преземена од речиси сите домашни медиуми. Затоа го имаме овој своевиден домино-ефект: „Првиот згреши, а потоа и сите по него“.
Затоа, еве, како поука во форма на тоа што вели сервисот на „Ројтерс“ во својот „Прирачник за новинарство“:
Прецизноста и непристрасноста се белегот на Томсон Ројтерс новинарството. Ниту прецизноста ниту непристрасноста смеат да се жртвуваат заради брзина. Двојно проверете ги фактите, БРОЈКИТЕ, имињата, датумите…
Ах, таа запирка, што белја направи.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно точни
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
повеќе извори
повеќестрани
СЕОПФАТНОСТ
несеопфатнo
пласира погрешна информација
ПРИСТРАСНОСТ
делумно прикажува вистина
нема извртување на вистина (спин)
лажни информации
балансираност
КОМЕНТИРАЊЕ
нема коментаторски елементи
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
можело и подобро, не продава, туку дава аеродроми под концесија
некреативен
сензационален
несоодветен
нејасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови