Рецензија: Аналитичари: Груевски ги зацрвсти црвените линии
Објавено во Рецензии
on 23 - 04 - 2015 Автор: Оливера Војновска
Пред нас е тенденциозен, едностран прилог во кој опозицијата и нејзиниот лидер се претставени како креатори на црни сценарија и како дестабилизирачки фактор во државата. За таа цел се користи обраќањето на премиерот на собирот во Прилеп (18 април 2015 година), како и мислењето на само еден аналитичар, кое, пак, се издигнува на ниво на став на цела експретска јавност.
Линк до оригиналниот напис: Аналитичари: Груевски ги зацрвсти црвените линии
Датум и време на објавување: 19.04.2015, 18:23
Датум на рецензирање: 20.04.2015
Рецензент: Оливера Војновска
СПИНЕРСКО ВРАМУВАЊЕ
Прилогот е така скроен и палсиран што создава слика дека опозицијата со објавувањето на прислушуваните „креирани“ материјали прави штета на угледот на државата и подготвува терен за да ја наруши безбедноста на сопствената земја! Од друга страна, се воздигнува премиерот и се нагласува неговата решеност „да не дозволи да се реализираат намерите на сценаристите на Заев! “
Практично, на гледачите им се подментува една наменска квазианализа на говорот на Груевски, со извлекување на неколку поенти од неговото обраќање во кое тој го напаѓа лидерот на опозицијата и користи потценувачки, па и навредлив речник.
„…Од време навреме ќе подвикне малку ќе се закани, всушност далеку во него се крие уплашено човече…“ (Груевски за Заев)
Притоа, се вади фрагмент од настапот на шефот на опозицијата на една охридска телевизија (16 април 2015 година) и се претставува дека тој, наводно, изјавил: „може и крв да падне“! Истовремено, се истакнува како премиерот „реплицирал со директна порака дека нема да дозволи дестабилизација на земјата.“
Каква „закана“, пак, искажал Заев станува јасно дури откако ќе се слушне прашањето на водителката: (39,55 минута од видеозаписот) „што сѐ прави за да се избегнат црни сценарија“ , на кое тој, меѓу другото, вели:
„… Не може Заев кој се бори за слобода и демократија да сака да падне крв, макар од прстот на некој наш граѓанин. Не аман, но гледам дека тоа може да се случи, затоа што гневот расте, притисокот кон опозицијата која го предводи тој процес е огромен…“ ( 40,06 минута од видеозаписот)
Ама, со селективниот пристап и спинерското врамување на неговиот исказ се конструира приказната за „агерсивниот Заев“.
САМО ЕДЕН АГОЛ
Впечаток е дека и изборот на експертот е направен за да ги потврди тезите на премиерот. Имено, овој аналитичар е постојано присутен во медиумите со изјави, во кои ја брани власта, така што, не може да се каже дека неговите ставови јавноста ги доживува како независни. Дополнително, тој е единствениот аналитичар кој е вклучен во прилогот, а наспроти овој факт, во насловната конструкција е употребен терминот „аналитичари“. Што алудира на тоа дека написот го пренесува доминатното експертско гледиште.
Манипулативниот дух се задржува до крајот на текстот, каде преку „независниот аналитичар“ се потсетува само на повиците од дипломатите упатени до опозицијата (да се врати во парламентот), а воопшто не се споменуваат пораките до власта.
Како, на пример, онаа на заменик-помошникот државен секретар за европски прашања на САД, Хојт Ји од 17 април 2015 година, кој смета дека „во прислушуваните разговори има доволно информации што ја обврзуваат Владата да ги ангажира институциите да отворат истрага истрага за тврдењата за незаконското работење и за наводниот криминал што произлегува од прислушуваните разговори.“
Но, очигледно е дека националната телевизиска куќа немала намера на публиката да ѝ понуди непристрасен, реален приказ на состојбите. Затоа и материјалот што го рецензираме ги перцепира нештата исклучиво од еден агол, оној на власта!
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
делумно
ИЗВОРИ НА ИНФОРМАЦИИ
има евидентирани извори
официјални, неофицијални
релевантни, нерелевантни
2 извори
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
нема
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски уреден
поврзан со тагови