Пред нас имаме еден текст кој може да се смести во жанрот научна фантастика. Не во смисла дека вакво нешто досега не сме прочитале, туку во намерата и пораката која го испраќа текстот. Всушност, вакви приказни сме гледале во најмала рака во филмовите на Џемс Бонд, каде тој го спасува светот од крвава војна. Слична, ако не иста е и приказната во овој текст, за кој мора да се напомене дека дел од фактите се точни. А, тоа е дека 20 луѓе од компанијата „Freescale Semiconductor“ навистина исчезнале со малезискиот авион. Но, сето друго во текстот, па и да е точно, не може да се потврди, туку служи само да се посее страв. Приказната е премногу комплицирана и, всушност, сака да каже дека е „најстрого чувана светска тајна“. Сепак, во неа нешто не „штима“. Инаку, зошто овој текст би се појавил на 28 март 2014 година, кога и самата компанија овој податок, дека со авионот исчезнале 20 вработени, официјално го објавила на 8 март 2014 година. Никаде, пак, во текстот не може да се забележи поентата од насловот, односно да се види зошто тие би биле масони и ако веќе се од кој ред, на пример. Колку да има некој валиден податок, не за друго.

Линк до оригиналниот напис: 20 масони исчезнале во малезискиот авион: Мултимилијардерот Ротшилд стана единствен сопственик на микрочипот од иднината?

Датум и време на објавување: 28.03. 2014, 11:05

Датум на рецензирање: Владо Ѓорчев

Рецензент: 03.04.2014

КОИ СЕ ЛУЃЕТО

Текстот е вистинит само во тоа што навистина 20 вработени од компанијата исчезнале со малезискиот авион. Но, никаде не може да се прочита, па дури ни самата компанија не тврди, дека тие луѓе биле членови на високите раководни ешалони на компанијата. Напротив, од команијата тврдат дека тоа се, всушност, само вработени затоа што според овој цитат за компанијата:

„Freescale Inc е американска компанија која произведува и дизајнира вградени хардверски, полупроводнички чипови за употреба низ целиот свет. Компанијата се фокусира на автомобилската индустрија, а во своето портфолио вклучува и микропроцесори, микроконтролери, дигитален сигнал процесори, дигитален сигнал контролери, сензори и слично. Покрај тоа, компанијата нуди софтвер и развојни алатки за поддршка на развој на производот. Фирмата е со седиште во Остин, а работи во повеќе од 20 земји.

На 8 март, 2014 година, Freescale најави дека 20 од своите вработени биле патници на Малезија ерлајнс 370.“

Се гледа дека патниците биле само вработени во компанијата. Да напоменеме дека ова се официјални податоци.

ФАМОЗНИОТ ЧИП KL-03 9

И да. Целата приказна е околу извесен чип KL-03 9 (кој служи како гаџет за електронско војување, барем така тврди текстот) и сега без тие 20 луѓе го има само сопственикот на компанијата, мултимилијардерот Јаков Ротшилд. Премногу филмски, нели?!

Нема извори на информација, најверојатно текстот е преземен од некој медиум од странство, но не е посочено од кој.

Текстот има материјал дека 20 луѓе од оваа компанија се исчезнати. Но, другото не може да се потврди. Нема пристрасност, но се сакало малку да се подигне читаноста. Инаку, овој текст нема некој друг ефект. Нема коментирање туку само пренесени заклучоци. Се гледа дека не се авторски и се од медиумот од каде што се земени.

Насловот е сензационален и привлекува внимание. Всушност насловот го тера читателот да го прочита текстот.

ФАТЕТЕ ГО КРАДЕЦОТ

Фотографијата е ставена само како илустрација од сопственикот на компанијата и наводно е човекот кој во мометнов е еден од најмоќните во светот.

Вакви текстови, кои треба да предизвикаат паника, одмана не ги ставаме во таканаречените забавни рубрики кои покриваат магазински содржини. Всушност, вакви текстови можат да бидат и опасни. Можеби не во Македонија, каде читателската публика и не е преокупирана од вакви текстови кои обработуваат високи светски политики на високите елити, но, на пример, во САД ваквите тесктови можат и навистина да предизвикаат страв кај населението. Тоа секако е до менталитетот на народот и до пропагандата која ја врши власта, па засега можеме да бидеме мирни дека Македонците нема да се потресат за овој текст.