[Рецензија: Горан Груевски утрово сам се појавил во Судот – СЈО повторно во Холивуд]

Непознавање на процедура, поради што се влече погрешна теза (по сè изгледа намерно), од што, пак, произлегува дезинформација на јавноста. Се обвинува Специјалното јавно обвинителство дека „политички одработува“ во случајот „Тврдина“, конкретно делот за потрагата по началникот на Петтата управа во МВР. Ама, недостигот од аргументи упатува на тоа дека, најверојатно, тој што медиумски обвинува за функционирање по политички наредби, како самиот да одработува по политички диктат.

Линк до оригиналниот напис: Горан Груевски утрово сам се појавил во Судот – СЈО повторно во Холивуд

Датум и време на објавување: 30.03.2016, 11:25

Датум на рецензирање: 31.03.2016

 Рецензент: Владимир Мирчески

 АКО БАБА ЛАЖЕ, РОГ НЕ ЛАЖЕ

 „СЈО по политичка наредба повторно со Холивудско сценарио.“

Ваквите коментари не се од голема помош во мисијата за прикривање на реалната ситуација и за извртување на случувањата. Началникот на Петтата управа во МВР извесен период не ѝ бил достапен на полицијата, иако не можел, а да не знае дека по него се трага на барање на Специјалното јавно обвинителство. Ова го аргументираме со фактот дека вечерта меѓу 29 и 30 март низа медиуми ја објавија веста, повикувајќи се на СЈО, дека се бара висок функционер во МВР.

„Истиот немал добиено никаква покана за разговор од СЈО и покрај тоа што медиумите на СОРОС и СДСМ влегоа во хистерија и цела вечер спроведуваа хајка.“

Одговорот на ова тврдење го даде Специјалното обвинителство чија прес-конференција (30 март 2016 година) се совпаѓа со објавувањето на овој текст.

Не се обидовме да го поканиме, тоа не ни е законска обврска да го поканиме осомничениот. Значи, во моментот кога ќе утврдиме дека постојат околности кои упатуваат на опасност од бегство, кои упатуваат на сите други основи врз кои може да се изрече мерка притвор ние може да побараме судот да изрече притвор. Во текот на вчерашната вечер секаде беше објавено, во медиумите, дека токму осомничениот се бара така што неговото непојавување до сега токму ги оправдува нашите стравови за постоење на околностите за определување мерка притвор.“ (Ленче Ристовска, обвинителка во СЈО,  од  00 – 00,40 минута од видеозаписот од  новинарските прашања)

 

„Токму преку тие медиуми разбрал дека го бараат и уште утринава сам се појавил во суд… Пресс 24 дознава дека утринава началникот во УБК Горан Груевски сам се појавил во Основниот суд Скопје 1 Скопје.“

Значи цела вечер тој не знаел, не видел, не дознал, не бил информиран дека полицијата го бара низ Скопје, но, ете, увидел изутрината и сам се пријавил во судот, ама за тоа не дознала најповиканата институција, таа што го гони – Специјалното обвинителство.

„Во текот на прес-конференцијата од страна судот по телефонски пат сме известени дека околу 1 часот првообвинетиот ќе се јави во Кривичниот суд и ние очекуваме покана да присуствуваме во однос на одлучувањето за предлогот за определување мерка притвор.“ (Катица Јанева, специјална јавна обвинителка, од 3,20 до 3,41 минута од  видеозаписот од новинарските прашања)

 

„Сметам дека ако првоосомничениот изутринава бил во Судот прв некој кој што треба за тоа да се извести е надлежниот јавен обвинител, а тоа се обвинителите од ова јавно обвинителство. За жал, не знам од кои причини, бевме известени во моментот кога специјалната јавна обвинителка дојде да каже дека тој ќе се појави во еден часот во судот“. (Ленче Ристовска, обвинителка во СЈО,   од 14,30 до 15,50 минута од видеозаписот од новинарските прашања)

• Факт: по човекот се трагало, ама тој бил недостапен.
• Факт: знаел дека го барале, ама се пријавил кога тој проценил, наводно кога „разбрал“ дека е баран.
• Факт: запазена е законската процедура, за што говорат и наредните чекори што ги презеде надлежниот суд.

Овие клучни елементи за целиот настан во текстот се „замачкани“, ама како што вели народната „ако баба лаже, рог не лаже“.