[Рецензија: Браво Коце – не можете вие да уништувате колку што ние создаваме]

Додворувачко четиво. Наменски текст што треба да ги воспева „квалитетите“ на првиот човек на Град Скопје, кој, надвор од надлежностите, а и од протоколот, изигрува „комуналец“ пред објективите на медиумите. Овој напис е една најобична реклама за градоначалникот и сериозна антиреклама за демонстрантите.

Линк до оригиналниот напис: Браво Коце – не можете вие да уништувате колку што ние создаваме

Датум и време на објавување: 06.06.2016  23:55

Датум на рецензирање: 07.06.2016

Рецензент: Владимир Мирчески

ПЛОШТАДОТ ЌЕ СЕ ИСЧИСТЕШЕ И БЕЗ КОЦЕ „КОМУНАЛЕЦ“

Ова е материјал „творен“ во доцните вечерни часови, веднаш по промо-позирањето на Коце Трајановски, кој, ете, на надлежните комунални служби им покажува како се мие „демонстрантска боја“ од плочникот на скопскиот плоштад. Навистина, настанот е смешен – демек, луѓето платени за одржување на чистотата не умеат, не знаат, како да ја исчистат бојата, па мора да помогне човек кој има сосема друга функција – да менаџира со Градот и со неговите потреби.

Значи, ако градоначалникот се занимава со нешто што не е во опис „и попис“ на неговото работно место, тоа не го прави подобар градоначалник! Сигурно и без тоа има работа преку глава со неговите предвидени обврски. Искрено, излегувањето на терен како некој си специјалец е само смешен маркетиншки трик и промоција на Трајановски, нешто што е својствено за балканските политичари. Сепак, ситуацијата заслужува да се обележи, ама повеќе на сатиричен отколку на воздигнувачки начин, зашто е јасен и очигледен рекламен штоф. „Браво Коце“ дури може да помине и како изборна парола на наредните локални избори, во 2017 година.

Но, ајде што му се аплаудира на Коцета, туку истовремено и се плука, ама од дното на душата, по другата страна. Пристапот е строго личен, написот малку застранил во првото лице множина, па гледаме апсолутно поистоветување со владејачката партија:

„Браво Коце – не можете вие да уништувате колку што ние создаваме“.

Кој е тоа „ние“, останува нејасно.

Новинарот мора да обезбеди професионална дистанца од политичките субјекти, вели член 14 од Кодексот на новинари.

Трите пасуса текст се строго коментари, фалбаџиски за градскиот татко, ултранегативни за демонстрантите и за нивните методи на изразување незадоволство од владеењето на актуелната постава.

„По дивеењето на соросоидните ботови организирани од Заев, платени од парите на Сорос и УСАИД, градоначалникот на Градот Скопје вечерва е на терен и со црево и вода ја чисти бојата која ја истурија „умерените” терористи врз новиот плоштад „Македонија”, на тој начин вулгаризирајќи и злоупотребувајќи ја смртта на едно младо момче чиј убиец е позади решетки, за политички цели.

Градоначалникот на град Скопје во моментов е излезен на плоштадот „Македонија” заедно со дежурните екипи на „Комуналец” и со вода ја чисти бојата која врз новиот, преубав плоштад ја иструрија „умерените” терористи на Заев и соросоидно/УСАИД-ската здружина, злоупотребувајќи ја на тој начин смртта на младо момче чиј убиец е позади решетки, во политички цели.“

 

Кодексот на новинари е јасен во поглед на ваквата злоупотреба.

Новинарот треба да прави разлика меѓу фактите и мислењата, меѓу веста и коментарот – член 13 од Кодексот на новинари.

„Соросоидни ботови, платеници, СОРОС, УСАИД, терористи“… Формулации за маалски муабет со евентуален конспиративен шмек, ама секако несоодветни за текст што треба да биде коректен медиумски производ. Еден куп обвинувања, ама слабо аргументи и докази. Секако, секој има право да се согласува или не, да ја одобрува или не активноста на „Шарената револуција“, ама не вака, преку медиумско распнување на некакви „ботови, терористи и платеници“.

Таквата ситуација со овој напис ниту „Коце не ја мие“.