Наменско четиво кое ја извртува вистинската слика
Објавено во Рецензии
on 28 - 12 - 2015 Автор: Владимир Мирчески[Рецензија: Јанева под сдсмовска директива го ослободува Верушевски од притвор]
Невистина, манипулација, а и непознавање на правната процедура… Наменско четиво кое на тенденциозен начин ја извртува реалноста и намерно ја заведува публиката на „темната страна“, сервирајќи своевидни партиски билтени, „обландирани“ во наводна информација. Серија обвинувања и етикетирања, а никаде факти и аргументи. Резил-текст!
Линк до оригиналниот напис: Јанева под сдсмовска директива го ослободува Верушевски од притвор
Датум и време на објавување: 25.12.2015, 15:10
Датум на рецензирање: 26.12.2015
Рецензент: Владимир Мирчески
СЕРИЈА ГРЕШКИ
Написот има серија недостатоци, кои ќе ги групираме во три столбови:
1. Правен аспект и невистинитост
Обвинителството предлага укинување мерка притвор, а судот решава. Тоа значи дека тврдењето „Јанева ќе го ослободи Верушевски од притвор“ е тешка невистина, но и промашување, што покажува дека тој што го напишал или, пак, препишал текстот нема абер од следење, новинарски кажано, судство и судски процеси. Дека некој „заталкал“ во темата или намерно застранил, зборува и цитираниот став на Специјалното јавно обвинителство во кое јасно се наведува што било предложено:
„Ве известуваме дека од страна на одбраната за обвинетите предложено е укинување на мерката притвор и определување на гаранција, по однос на што, а постапувајќи по барање на Судот, ние дадовме позитивно мислење во кое појаснивме од кои причини сметаме дека постојат услови мерката притвор да биде заменета со гаранција“.
За разлика од овој материјал, во написи објавени во други медиуми, може да се види дека веста е јасно и прецизно пренесена, така како што треба.
2. Коментари, спинувања, етикетирања, пристрасност
Текстот што го рецензираме е силно проткаен со коментари. Спин-елементите се толку нагласено застапени, што генерално гледано, реалноста е искривена до мерка на непрепознатливост.
- Скандал на специјалната јавна обвинителка, Катица Јанева ќе го ослободи Верушевски од притвор.
- Ова е срамно однесување на јавната обвинителка и секако е голем скандал при нејзиното работење.
- Јанева докажа дека е параван на Заев додека тој го крши и законот и договорот од Пржино.
- Неделникот Фокус кој во јавноста важи како партиско гласило на СДСМ…
- Со ваквата одлука на Јанева, таа остава основан простор за сомнеж дека работи целосно под палката на Зоран Заев, а ослободувањето на Верушевски кој се терети за тешко дело, е огромен скандал.
Пристрасноста на овој напис се гледа од авион. Доволно е само да се прочита соопштението на владејачката партија и работите стануваат јасни. Дополнително, кога ќе се видат и другите безмалку идентични текстови, впечатокот на политичко-партиска диригираност е неизбежен.
Инаку, за одбележување е тоа што за разлика од првичните изјави на премиерот, дадени во време на изборот на Јанева, таа веќе не ѝ по ќеф на власта.
3. Неаргументираност и отсуство на извори
Каде се аргументите или фактите за изнесените тврдења? Каде се доказите за „соучесништво“ на специјалната обвинителка со првиот опозиционер? Кој вели дека таа е нечија „маша“ и работи по директива на СДСМ? Нема одговор на овие прашања, поточно нема и соодветен извор кој би ги оправдал тешките зборови. Можеби е така, а можеби не. Нагаѓања и шпекулации од типот „рекла-кажала“ поминуваат во муабет и во дебатирања по кафеани, а не во новинарски написи.
Значи, утната основна теза и понатамошно потфрлање на речиси сите елементи што треба да ги има еден нормален текст. Ова е материјал на кој не треба да се троши време.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
делумно
не може да се утврди точноста на наводите
неверодостојни наводи
ИЗВОРИ НА ИНФОРМАЦИИ
делумно
официјални, анонимни
нерелевантни
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
несоодветна
манипулира
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови