[Рецензија: Курир: Синиот телефон на Телма повторно заѕвони (ВИДЕО)]

Овој текст е уште еден во низата напади врз телевизија „Телма“. Последните недели оваа телевизија се најде на тапет на провладините медиуми, кои ја оцрнуваат и ја обележуваат како сдсмовска, која работи под директива на опозицијата.

Линкуван наслов на анализираниот напис: Курир: Синиот телефон на Телма повторно заѕвони (ВИДЕО)

Датум и време на објавување: 01.11.2015

Датум на рецензирање: 06.11.2015

Рецензент: Ана Анастасовска

„Телевизија Телма, од вчера и официјално потврди дека нема намера да работи објективно и дека за неа не претставуваат вест проектите што ги реализира Владата на Република Македонија. За отчетноста на Владата, според Телма граѓаните не треба да слушнат, пренесе Курир.“

Уште во воведот од написот, новинарот ја става телевизијата на тапет, бидејќи немала намера да објавува вести за проекти на Владата, а како поткрепа на тоа наведува дека „телевизијата официјално потврдила“.

Она што внесува забуна во овој дел од написот е како тоа „Телма“ „официјално потврдила“ дека нема намера да работи објективно? Исто така, не е јасно на кои проекти на Владата се мисли. Што тоа толку важно се случило тој ден, а „Телма“ не го покрила? Ако имало некоја од оние рекламирачки посети каде министрите и премиерот имаат микрофон и одат во посета на локални проекти, ним и не им е место во дневник на национална телевизија.

„Тоа практично значи дека Телма го смета како неинтересно и неважно зголемувањето на пензиите за 5 проценти годинава, односно 70,3% проценти од 2006 година заклучно со октомври годинава. Телма смета дека за граѓаните е неважно да знаат за зголемување на социјалната помош или отварањето на илјадници нови работни места во индустриските зони.“

Зголемувањето на пензиите и на социјалната помош, како и отпишувањето на долговите на социјалните случаи се стари вести и тоа од пред еден месец, така што не се актуелни и нема потреба телевизијата да информира за бајати вести.

Во ред е секој да има свое мислење за некој медиум, за тоа како работи и што објавува, но таквото мислење може да се пренесе во форма на колумна или коментар. Вака пренесен написот, наликува на партиско соопштение кое има цел да напаѓа и да оцрнува друг медиум.

Според наводите на авторот на текстот, телевизијата требало да известува за „остварувањата на владата, а не за ветувањата на опозицијата“.

„Праксата да се дава приоритет на ветувањата, а да се игнорира остварувањето на тие ветувања, потсетува само на 15 Септември. Граѓаните кажаа што мислат за политиката „ќе вработиме по еден од секое семејство“.“

На кои ветувања се мисли тука и кој ги остварувал тие ветувања? Дали, можеби, новинарот мисли на тоа дека опозицијата ветувала, а Владата остварувала, па поради тоа телевизијата треба да информира за работата на Владата, а не за ветувањата на опозицијата? Значи, се напаѓа телевизијата дека не е објективна затоа што не информирала за бајати вести, а, од друга страна, не требало да информира за активностите на опозицијата. И каде е сега тука објективноста на новинарот?

Понатаму, за да биде нападот врз телевизијата уште посилен, имаме навраќање на стари теми и повторување, за да се убеди читателот во тезата на новинарот дека „Телма“ работела по налог на опозицијата.

„Телма неодамна се посрами и со објавување на невистинита и непроверена вест дека Претседателот на Европската комисија Жан Клод Јункер наводно ја повлекол поканата за Премиерот Груевски, а срамот потоа кулминираше со необјавувањето на официјалните деманти.“

„Телма“ ги објави сите деманти и сите изјави од сите страни во однос на овој прилог, така што потсетувањето на него, и тоа по којзнае кој пат, претставува хајка. Задача на новинарот е да информира, а не да суди или да води политички битки.