Експертски славопојки: 3-0 за владејачката партија
Објавено во Рецензии
on 12 - 04 - 2016 Автор: Владимир Мирчески[Рецензија: Експертите анализираат: ВМРО-ДПМНЕ ја доби довербата на народот, а СДСМ добива само ако не излезе на избори]
Што се добива кога ќе се измешаат анкета спроведена од институт во „крвно сродство“ со владејачката партија и „експертски“ мислења од луѓе кои или се дел или се блиску поврзани со владејачката партија? Нормално, славопојка за власта.
Линк до оригиналниот напис: Експертите анализираат: ВМРО-ДПМНЕ ја доби довербата на народот, а СДСМ добива само ако не излезе на избори
Датум и време на објавување: 09.04.2016, 17:57
Датум на рецензирање: 10.04.2016
Рецензент: Владимир Мирчески
ФАЛБИ, ФАЛБИ И САМО ФАЛБИ
Фабричка маана и тоа непоправлива. Дефектот не го отстранува ниту „сериско отповикување од производителот“. Едноставно кажано, едностраноста и пристрасноста се толку навлезени во сржта на материјалот што ако се обидете да ги отстраните, и тоа по хируршки пат, ќе добиете гола нула. Токму така, целта на текстот е да биде необјективен и да ја прикаже само едната верзија на приказната, онаа што ја сервира владејачката партија. Затоа и пристапот е таков.
Се тргнува од информација за резулатите од истражување на јавното мислење спроведено од институт, кој во најмала рака важи за организација што функционира само во интерес на ВМРО-ДПМНЕ. На тие податоци потоа се „накалемуваат“ ставови на луѓе кои се претставуваат како експерти.
За појаснување, еден од тројцата т.н. експерти, бил пратеник во Собранието на РМ од редовите на ВМРО-ДПМНЕ. Истиот човек својата партија, која сериозно киксна на изборите во 2011 година, подоцна ја припои кон ВМРО-ДПМНЕ. Тој човек во моментот ја извршува функцијата директор на Државниот архив. Значи, тој е сè само не веродостоен и објективен експерт во ситуација кога треба да се анализира политичката ситуација и односот меѓу власта и опозицијата.
Вториот „експерт“ е универзитетски професор, редовен јавен поддржувач на политиките на власта, а од неодамна и тазе член на Комисијата за заштита од дискриминација. Чинот на неговото назначување опозицијата го поврза токму со одбраната на ВМРО-ДПМНЕ при објавувањето на т.н. „бомби“.
Третата експертка во написот, исто така, е универзитетска професорка со долг стаж, која во последниот период е повеќе од ревносна во позитивното оценување на чекорите на власта, наспроти тие на опозицијата. Од неодамна таа е и претставник на Македонија во Венецијанската комисија.
Ај што биле малку тројца „независни“ експерти, па биле искористени и анонимни „познавачи“ надградени со „пригодни“ коментари:
„Познавачите на состојбите велат дека на раководството на СДСМ му е сосема јасно дека освен што сега има катастрофален рејтинг, довербата која граѓаните ја имаат во нив дополнително ќе се намалува. Наводната борба за слобода на СДСМ нема да го крене рејтингот на опозицијата затоа што во очите на граѓаните тоа е негативна кампања.“
„Според експертите, ваквиот резултат на анкетите се должи и на разочарувањето кај граѓаните од делувањето на министрите на СДСМ кои не реализираа ниту еден проект.“
Голи фалби, крајна необјективност и пропагандистички пристап.
„Експертски“, 3-0 за владејачката партија, нема што!
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
не може да се утврди точноста на наводите
делумно
ИЗВОРИ НА ИНФОРМАЦИИ
има евидентирани извори
неофицијални, анонимни
повеќе извори
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
не информира
некреативен
несензационален
несоодветен
тенденциозен
ФОТОГРАФИЈА
има
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
нема мултимедијални елементи
нема контекстуални линкови
стилски уреден
поврзан со тагови