[Рецензија: ВМРО-ДПМНЕ: Ако нема избори на 24 април, Договорот од Пржино нема да важи]

Пример за тоа како може да се преземе една вест и потоа да се урниса со неквалитетни „надградени“ состојки. Убава информација од кредибилен извор добива поинаков тек зашто некој проценил, ама, за жал, погрешно, дека има потреба од коментаторски формулации како „бегање од избори“, „партија која не сака да се појави на избори“, „паника“, „катастрофа“ итн. Ова малку наликува на примерите од автомобилската индустрија во минатото – кога некоја источноноевропска држава ќе преземеше од Западна Европа мотор за свој модел на возило и потоа ќе го „дополнеше“ со т.н. технички новитети, кои не само што не ги подобруваа неговите перформанси, туку и ги расипуваа.

 Линк до оригиналниот напис: ВМРО-ДПМНЕ: Ако нема избори на 24 април, Договорот од Пржино нема да важи

 Датум и време на објавување: 05.01.2016   18:18

 Датум на рецензирање: 08.01.2016

 Рецензент: Владимир Мирчески

СИЛНА СУГЕСТИВНА НОТА

Станува збор за политичка вест на денот, владејачката партија излегува со став дека Договорот од Пржино не важи ако некој се осмели да ги помести изборите од 24 април. Коректно е наведено дека изјавата на шефот на Центарот за комуникации е дадена за друг медиум, тој фино е цитиран, пренесен е и ставот на опозицијата, даден за истата агенција за која зборувал и претставникот на власта, ама…

Зошто речиси секогаш мора да има „ама“?! Ама, во просторот, еве така да го наречеме, меѓу изјавите на Котевски и на Шекеринска напикани се „авторски“ интеревенции, кои не се ништо друго туку коментаторски елементи со силна сугестивна нота, кои на читателите им го наметнуваат сопственото видување на актуелната политичка ситуација. Употребениот израз е агресивен, ептен забележлив, и не ѝ остава многу шанса на публиката сама, врз основа на презентираните изјави, да донесе свој суд, заклучок што вели едната, што другата страна и каде е вистината. Напротив, тука априори предност им се дава на ставовите на владејачката партија:

„Од СДСМ остануваат на политиката на бегање од граѓаните. Опозициската партија исто како и на сите 4 последни избори најавува дека нема да се појави пред граѓаните бидејќи според нив, не биле испочитувани сите обврски.

СДСМ е единствената партија во светот која иако е во опзиција не сака да се појави на избори.

Додека СДСМ бега од граѓаните, во албанскиот политички блок има консензус дека избори во април мора да има.“

„ДИВО МЕСО“

Еве по илјадити пат да повториме, Кодексот на новинарите вели:

Новинарот треба да прави разлика меѓу фактите и мислењата, меѓу веста и коментарот (член 13)

А не, како овде, со инка да им се сипуваат ставови на читателите, манипулирајќи дека станува збор за обична вест.

Од професионална гледна точка, апсолутно немало потреба од таквиот пристап. Од политичка перспектива, тој е оправдан, ама да бил пласиран во партиско соопштение, а не во новинарски текст наменет за широк круг на граѓани, кои не сите се членови на владејачката партија.

Претходно констатираното укажува на висока пристрасност. Поточно, коректен е само делот што е преземен од агенциската вест, а сето друго е „диво месо“, никнато од нигде никаде.

Пример за тоа се споменатите експерти! Ако веќе се нотира некаво си нивно мислење, би било во ред тие да се именуваат или барем да се линкуваат нивни изјави дадени порано или за друг медиум. А не вака, да се „пука“ со куршуми-ќорци т.н. анонимни експерти.

Не знам зошто нема понудено соодветни аргументи, дали опозицијата, како што се вели, бега од избори, ама ми се чини дека текстов јасно бега од професионалното новинарство.