Спинерски текст за политичка пресметка
Објавено во Рецензии
on 9 - 01 - 2016 Автор: Ана Анастасовска[Рецензија: Класична одмазда на Спасовски- ќе го менува началникот на организиран криминал]
Пред нас имаме текст со впечатлив наслов, напишан во сензационалистички манир. Написот натежнува од тенденциозни напади, во него се нижат непотврдени обвинувања и лични дискредитации.
Линк до оригиналниот напис: Класична одмазда на Спасовски- ќе го менува началникот на организиран криминал
Датум и време на објавување: 03.01.2016
Датум на рецензирање: 08.01.2016
Рецензент: Ана Анастасовска
НЕПОТКРЕПЕНИ ТВРДЕЊА
„Техничкиот министер за внатрешни работи Оливер Спасовски продолжува да им се одмаздува на професионалците во МВР кои учествуваа во разоткривањето на „Фабриката за афери“ на СДСМ.“
Уште на почетокот од текстот се изнесува сериозно обвинување, дека министерот Спасовски им се одмаздувал на професионалците во МВР. И наместо ваквата теза да се аргументира, написот, повикувајќи се на неименувани извори од МВР, излегува со целосно непоткрепено тврдење дека
„…следен на удар е началникот на Одделот за организиран криминал, кој успешно ја организираше акцијата која резултираше со разоткривање на „Фабриката за афери“.“
Понатаму, текстот ја открива причината за наводното разрешување на началникот:
„Одделот за организиран криминал во координација со надлежниот јавен обвинител, не само што успеаја да ја разоткријат фабриката за афери на СДСМ, туку успеаја да одземат бројни докази кои јасно укажуваа на партиската инволвираност на СДСМ во случајот, како и на луѓе од раководството на партијата, меѓу кои и Зоран Заев и Оливер Спасовски кои се фотографираа со осомничените.“
Но, иако овој напис со леснотија обвинува, сепак, не посочува конкретно кои се тие „бројни докази“ што говорат за поврзаност на Заев и на Спасовски со „Фабриката за афери“. Инаку, за споменатиот случај сè уште не е почнат судски процес.
НЕИМЕНУВАНИ ИЗВОРИ И „ВИРТУЕЛНИ“ ЕКСПЕРТИ
Материјалот што го рецензираме не нуди ниту докази за тврдењето дека:
„на удар ќе бидат и Началникот на Единицата за прв одговор и интервенција – АЛФА во СВР Скопје, помошниците на Директорот во Одделот за униформирана полиција, Одделот за криминалистичка полиција, Одделот за гранични работи и миграции, Началникот на Централните полициски сили (ЦПС), Началникот на Одделот за сузбивање на организиран и сериозен криминал и Одделот за криминалистичко-технички испитувања и вештачења.“
За пласирање на ваквата (дез)информација се користи воообичаената формулација „нашите извори велат“. Меѓутоа, новинарските правила налагаат тоа што го велат изворите да се провери пред да се објави. Сепак, тука не е направена таква проверка. Во написот нема став од засегнатите страни – министерот Спасовски и посочените началници на кои, наводно, им се подготвувала смена.
Текстот се повикува и на „виртуелни“ познавачи и без да пренесе конкретни експертски мислења, крерира перцепција дека „се прави хаос во МВР“.
Проблемот со овој текст, генерално, е што на читателите им се нудат непотврдени информации како стопроцентна вистина. Всушност, се подметнува една спинерска конструкција која има цел да ја нападне опозицијата, а особено да го дискредитира министерот Спасовски. Па, онака како што е скроен и пласиран, текстот нема многу допирни точки со новинарството, тој повеќе изгледа како да е политички инспириран.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални, анонимни
релевантни, нерелевантни
повеќе извори
повеќестрани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
не информира
креативен
сензационален
соодветен
тенденциозен
ФОТОГРАФИЈА
има
соодветна
манипулира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
поврзан со тагови