[Рецензија: Еве зошто Иванов им пречи на СДСМ и СОРОС: Нема пазарење со националниот идентитет!]

Медиумски спин-проект за „оправање“ на имиџот на шефот на државата за внатрешна употреба, со истовремено стигматизизрање на опозицијата и „фамозната СОРОС“ како лошите во „играта за името“ меѓу Македонија и Грција. Обидот е кредибилитетот на Ѓорѓе Иванов, силно еродиран, по одлуката за групна аболиција, да се зајакне преку патриотски сентимент, а притоа да им се наштети на политичките противници. Евтин трик за дефокусирање од актуелните маки, проблеми и грижи кои Македонија ги има во моментот -пред сè дома.

Линк до оригиналниот напис: Еве зошто Иванов им пречи на СДСМ и СОРОС: Нема пазарење со националниот идентитет!

 
Датум и време на објавување: 30.05.2016  18:24

Датум на рецензирање: 31.05.2016

Рецензент: Владимир Мирчески

 СИТГМАТИЗИРЕАЊЕ НА ОПОЗИЦИЈАТА И НА НЕВЛАДИНИТЕ

Како што веќе кажавме – ем дефокусирање на вниманието од клучни теми, ем истовремено атакување врз политичките противници и врз неподобните невладини организации. Тоа се главните карактеристики на овој материјал, кој според начинот на кој е пишуван, наликува повеќе на партиско-политички шнит, отколку на веродостоен текст со информација во неговата основа. Во ред, шефот на државата, на еден меѓународен форум, имал еден од неговите „познати“ настапи во кои ја обвинува Грција за блокираните европски и евроатлантски интеграции. Искрено, кој барем малку следи политика, знае дека таквиот вокабулар на Иванов не е ништо ново, ниту спектакуларно. Едноставно, човекот како да е заглавен во тој „семантички опсег“ и тоа е тоа. Значи, Иванов ниту кажал некоја спектакуларна информација ниту, пак, настапот е нешто како breaking news. Се согласувам дека треба да се одбележи и со тоа да заврши кусиот текст.

Но, проблемот е што на настапот на шефот на државата му се дава и пропатриотска нишка и предавничка нота за опозицијата.

„Македонскиот претседател со ова пред цела Европа испрати порака дека Македонија нема да дозволи пазарење со националниот идентитет.

Неговиот говор беше проследен со аплаузи од присутните, а медиумите на СДСМ и СОРОС истиот го критикуваа.

Ваквата порака разбуди силни емоции и поддршка кај македонските граѓани, а како остра нота беше примена од европските челници. Ваквата борбеност и одлучност во одбрана на Македонија им пречи само на СДСМ и платениците на СОРОС за кои македонските национални интереси воопшто не се важни.“

СПИН, НЕВИСТИНА И ПОЛИТИЧКА СЕРВИЛНОСТ

Навистина, од содржинска, суштинска гледна точка, а исто така и од професионален аспект, немало каква било потреба од ваквите формулации, обвинувања и коментари. Сè можело да помине со куса информација и со цитат од претседателот, но, не! Наместо тоа се искроило едно спин-четиво кое, да потсетиме, треба да ја подобри накршената политичка суета на Иванов, но и да го бетонира „предавничкиот имиџ на СДСМ и СОРОС-инсталациите“.

Таквиот пристап јасно кажува дека материјалот е обоен и, за жал, не ја крие својата пристрасност и непрофесионалност. Дополнително, невистина е дека дел од медиумите го напаѓале Иванов за овој сегмент од настапот. Критиките на сметка на шефот на државата беа за неговите гафови кажани на собирот, како, на пример:

„Сега и Исус Христос да се јави ќе го убијат. Истото важи и за Мухамед. И Мухамед да се јави ќе го убијат“, одговори значајно Иванов, кој учителот на Александар Македонски го нарече Александар наместо Аристотел. (Стандард, 29.05.2016)

Значи, имаме: спин, невистина, селективност и политичка сервилност.