Само да се плука по „Шарената револуција“
Објавено во Рецензии
on 30 - 05 - 2016 Автор: Ана Анастасовска
[Рецензија: Изградиле, па ќе уништуваат: Заев, Шеќеринска, новопечениот милионер Шилегов и платениците на Соорос и денеска се изживуваа со боја]
Овој текст е коментаторски и е полн со квалификации и со неиздржани обвинувања кои имаат цел да ја нападнат „Шарената револуција“, а особено некои функционери од СДСМ и граѓански активисти кои ги поддржуваат протестите.
Линк на оригиналниот напис: Изградиле, па ќе уништуваат: Заев, Шеќеринска, новопечениот милионер Шилегов и платениците на Соорос и денеска се изживуваа со боја
Датум и време на објавување: 25.05.2016
Датум на рецензирање: 29.05.2016
Рецензент: Ана Анастасовска
ЕТИКЕТИРАЊЕ
Уште во самиот наслов и на почетокот од текстот, имаме разни квалификации и етикетирања на поддржувачите на „Шарената револуција“.
„Претседателот на СДСМ, Зоран Заев, неговата заменичка Радмила Шеќеринска, новопечениот милионер Шилегов и платениците на Соорос, неѓу кои и Мирјана Најчевска, која денеска не го испочитува законот и не се јави на поканата за информативен разговор во полициската станица „Беко“, рамо до рамо и денеска се изживуваа со боја врз државниот и јавниот имот на Република Македонија, врз оние објекти кои ниту ги изградиле ниту некогаш се грижеле за нив“.
Портпаролот на СДСМ, Петре Шилегов, е етикетиран како новопечен милионер, иако написот не нуди дополнително објаснување за ваквите наводи. За професорката Мирјана Најчевска, пак, се посочува дека не го испочитувала законот и не се појавила на информативен разговор во полициската станица Беко. Меѓутоа, ваквата информација не е точна. Ако се обидете да најдете дополнителни информации на други медиуми, на пример, порталот „А1 он“, ќе може да се информирате дека Најчевска го испочитувала законот и отишла пред полициската станица Беко, но внатре на информативен разговор влегол нејзин адвокат, кој е легитимен и нејзин законски претставник. Тоа во овој напис не може да се прочита.
„Со вандалскиот чин на фрлање боја на Министерството за правда лидерот на СДСМ конечно го покажа висинското лице, дека не само што е лидер на опозицијата туку е и лидер на Шарената револуција“.
Ова е уште еден спин кој власта упорно го турка преку некои медиуми. Тоа што функционери на СДСМ ја поддржуваат „Шарената револуција“, не значи дека таа партија е организатор на истата. „Шарената револуција“ е граѓанска иницијатива зад која пред сè стои движењето „Протестирам“.
„КРИМИНАЛЦИ, ПЛАТЕНИЦИ И СОРОСОИДИ“
„И секако, не е случајно, аболираните криминалци, не можејќи да ѝ избегаат на правдата, удрија по Министеството за правда. Веројатно очекуваат дека нивното шарено дивеење ќе ѝ го попречи патот на правдата која неминовно ќе ги стигне. Тие наводно бараат укинување на аболицијата и еднаквост пред законот“.
Аболирани криминалци? Класично пресудување од медиумот без докази. Гореспомнатите се етикетираат како криминалци без да имаат некаква пресуда за сторено кривично дело. Тука е прекршен членот 8 од Кодексот на новинари во кој јасно е пропишано дека:
Во судските постапки треба да се почитува принципот на презумција на невиност, да се известува за сите инволвирани страни во спорот и да не се сугерира пресуда
Понатаму, од сите лица врз кои се атакува во овој напис, на листата на аболирани се најде само лидерот на СДСМ, Зоран Заев, и тоа не по негово барање. Тоа беше одлука на претседателот Иванов, кој одлучи да помилува 56 лица, меѓу кои, најголем дел функционери од власта.
Подолу во текстот повторно се користат класификации од типот „соросоиди и платеници“ и повторно се етикетира професорката Мирјана Најчевска.
Очигледна цел на овој новинарски прозивод ( ако може така да се нарече, бидејќи не исполнува ниту еден стандард за тоа како треба да изгледа еден новинарски текст), е ширење на политичка пропаганда и по секоја цена плукање по поддржувачите на „Шарената револуција“.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
не информира
некреативен
сензационален
несоодветен
тенденциозен
ФОТОГРАФИЈА
има
соодветна
информира
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
има контекстуални линкови
делумно стилски уреден
поврзан со тагови