Рецензија: Владата меѓу народот – функционерите на поплавените места низ Македонија
Објавено во Рецензии
on 10 - 02 - 2015 Автор: Оливера Војновска
Текстот што е пред нас преку спинерскиот наслов „Владата меѓу народот – функционерите на поплавените места низ Македонија“, испраќа порака дека власта (Владата) е грижлива и се солидаризира со маката на населението од поплавените подрачја. Оваа информација има цел да ја пофали Владата и да го нагласи ангажманот на премиерот и на дел од членовите на неговиот кабинет.
Линк до оригиналниот напис: Владата меѓу народот – функционерите на поплавените места низ Македонија
Датум и време на објавување: 07.02.2015, 12:59
Датум на рецензирање: 08.02.2015
Рецензент: Оливера Војновска
ПОПУЛИСТИЧКА ОБЈАВА
Материјалот нема проблеми со вистинитоста. Всушност, станува збор за најава на посетата на премиерот и на некои министри од редовите на ВМРО–ДПМНЕ, на реоните зафатени со поплавите. И, иако, тоа во написот не е прецизирано, веројатно за настанот е добиено соопштение од прес-службата на Владата. Проблемот е во начинот на кој е пласирана информацијата. Па, наместо една техничка вест, направена е популистичка, фалбаџиска објава за Владата.
Во неа јасно се препознава намерата да се истакне улогата на Владата во справувањето со последиците од поплавите. Особено се истакнува улогата на премиерот, чија целодневна агенда е објавена и тоа со прецизна сатница на средби и на разговори со локалните функционери:
„Во 14:00 часот, премиерот Груевски ќе оствари средба со граѓаните од поплавените локации во општина Новаци, а во 14:30 часот, ќе одржи состанок со локалниот кризен штаб во општината Новаци , на кој ќе присуствуваат градоначалниците на општина Битола Владимир Талески, на општина Новаци Лазар Котевски и на општина Могила Стево Пивковски.
Потоа, премиерот Груевски ќе оствари средба со претседателот на Сојузот на земјоделци Вељо Тантаров… Во 15:30 часот, ќе ги посети општина Могила и оштетениот мост на река Шемница…“
ВО СТИЛОТ НА ВУЧИЌ
Насловната конструкција е од два дела и има пропагандистички призвук. Во истиот тон е и почетокот на написот, каде веднаш по најавата за посетата на владиниот тим се вели: „на лице место се врши увид во состојбите, проценка на последиците, се координира системот на превенција, се разговара со луѓето“.
Несомнено, ваквата формулација не е избрана случајно, туку за да го зајакне ефектот на посветеноста на Владата. Иако е јасно дека ниту премиерот, ниту министрите не вршат увид, ревизија или процена на штетите. Впрочем, тоа и не е нивна задача. Тоа го прават стручни служби и специјализирани лица.
Фотографијата со која е илустриран написот, а на која во преден план се прикажани премиерот и министерката за внатрешни работи снимени „на местото на настанот“, дополнително го засилува впечатокот дека на читателите им е понуден пропагандно-рекламен материјал.
Гледано во целина, оваа медиумска содржина напишана во популистички манир, претседателот на македонската Влада го претставува во стилот на српскиот премиер, кој минатата година за време на катастрофалните поплави во Србија беше постојано присутен во медиумите и неуморно го градеше имиџот на главен јунак во спасувањето, делењето помош, кооординацијата и санирањето на состојбите.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
сеопфатнo
нема прикриени информации
ПРИСТРАСНОСТ
делумно прикажува вистина
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
манипулира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
неквалитетни мултимедијални елементи
нема контекстуални линкови
делумно стилски уреден
неповрзан со тагови