Рецензија: Утре мини геј парада во Скопје
Објавено во Рецензии
on 20 - 11 - 2013 Автор: Мирослава СимоновскаПред нас имаме вест со манипулативен, спинерски наслов. Од текстот е евидентно дека организациите кои авторот на текстот ги посочува како поддржувачи на Маршот за толеранција се организации од најразличен вид. Меѓу нив има организации за заштита на животните, младински организации, чиј примарен фокус е образованието и така натаму. Овие факти авторот не ги наведува во насловот. Наместо тоа, тој издвојува еден вид организации, конкретно организациите кои се борат за правата на ЛГБТ заедницата и Маршот за толеранцијата го поистоветува со „мини геј-парада“. Експликацијата дека станува збор за редакциска и уредувачка слобода не е валидна, поради тоа што читателот со ваквата селективност е доведен во заблуда и му се скратува правото на сеопфатно информирање како новинарска должност. Со други зборови, се јавува потреба да се елаборира зошто се става фокус токму на организациите кои промовираат заштита на човековите права, а не на толеранцијата како основно мото на маршот.
Линк до оригиналниот напис: Утре мини геј парада во Скопје
Датум и време на објавување: 15.11.2013; 23:48
Датум на рецензирање: 18.11.2013
Рецензент: Мирослава Бурнс
Вистинитост: Текстот содржи вистинити факти, извадоци од соопштение до јавноста и сеопфатно информира за учесниците во Маршот за толеранција, за мотивите на ваквото организирано изразување став, а содржи одговори и на основните новинарски прашања. Сепак, овие квалитетни аспекти на текстот се зацрнети со насловот и со илустративниот приказ. Иако организатор на настанот е невладина организација која ги заштитува правата на ЛГБТ заедницата, сепак од описот е јасно дека мотото на Маршот за толеранција е самата толеранција и животот ослободен од насилство, што авторот на овој текст со насловот го обезвреднува и го занемарува, а за сметка на тоа користи сензационализам. Крајниот резултат е дека насловот и текстот не прават една компатибилна целина, иако се прави обид тоа вешто да се прикрие со фотографија која не е од актуелниот настан за кој се известува, туку од претходен.
Извори на информации: Иако не е експлицитно наведено, текстот е составен врз основа на писмено соопштение од организаторот на настанот со уредничка интервенција во еден дел од текстот, каде дел од соопштението е претставено како изјава на организаторите.
Содржајност: Текстот е содржаен и дава одговор на основните новинарски прашања и го информира читателот за тоа каде и кога се одржува Маршот на толеранцијата. Она што насловот пак го прави, е сосема друго – го манипулира читателот давајќи му лажна информација дека станува збор за геј-парада.
Пристрасност: Насловот е пристрасен поради тоа што не се става акцент на тоа што толеранцијата е лајт-мотив на маршот, туку се навестува лажна информација дека ќе има геј парада. Поради ова читателот лесно може да се дезинформира.
Коментирање: Текстот не содржи коментари и е пристојно и професионално пренесен од соопштението со исклучок на насловот кој му дава „уреднички печат“ на делото и на некој начин го изразува ставот на редакцијата кон некое прашање. Потоа овој наслов и оваа перцепција, непрофесионално со „копи-пејст“ метод ја пренесоа и други интернет медиуми.
Оригиналност/Плагијат: Текстот е составен врз основа на соопштение за медиуми од организаторите и користени се реченични конструкции создадени од организаторите, односно од изворите. Не може да се каже дека ова е плагијат.
Квалитет на насловот: Насловот е сензационалистички, го менува контекстот на она што се изнесува во текстот и дезинформира.
Фотографија: Фотографијата, исто така, е манипулативна и оди во придружба на насловот, поради тоа што на неа се гледаат транспаренти од некој изминат протест со повици за сексуални права. Наспроти ова, повод за протестот е толеранцијата и спречувањето на насилството не само за лицата кои се припадници на ЛГБТ заедницата, туку и за сите граѓани по било кој основ.
Заклучок: Насловот е излог кој го „продава“ текстот, но доколку на излогот има манипулација, „купувачот“, т.е. читателот, ќе одбие да ја купи содржината. Во трката за поголема читаност, фактите треба да останат факти, а толкувањата се исфрлени од жанрот вест. Особено кога станува збор за маргинализирани групи, внимателниот пристап и политички-коректниот речник го дефинираат професионалниот пристап и општествената одговорност на новинарот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
и точни и неточни
делумно
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
сеопфатнo
нема прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
не аплиактивно
друга пристрасност
КОМЕНТИРАЊЕ
нема коментаторски елементи
ПЛАГИЈАТ
делумна копија
ненаведен автор
КВАЛИТЕТ НА НАСЛОВОТ
дезинформира
сензационален
несоодветен
тенденциозен
ФОТОГРАФИЈА
има
несоодветна
манипулира
ненаведен автор(извор)
ГОВОР НА ОМРАЗА
нема навредлив говор
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови