Рецензија: Собранието ги донесе измените на Уставот
Објавено во Рецензии
on 22 - 07 - 2014 Автор: Оливера Војновска
Текстот што го рецензираме, преку насловот: „Собранието ги усвои измените на Уставот“, фактички, во јавноста пренесува невистинита информација: парламентот на седницата одржана на 16.07.2014 донесе Одлука за пристапување кон измена на Уставот. Или, поедноставно кажано даде согласност да започнат уставните измени, со кои, меѓу другото, бракот се дефинира како заедница меѓу маж и жена.
Линк до оригиналниот напис: Собранието ги донесе измените на Уставот
Датум и време на објавување: 16.07.2014, 17:24
Датум на рецензирање: 21.07.2014
Рецензент: Оливера Војновска
ГРЕШКА
Текстот се повикува на на собраниската седница од 16 јули, на која со двотретинско мнозинство беше изгласана Одлуката за пристапување кон измена на Уставот. Во него е наведено и дека тоа го констатирал претседателот на Собранието, кој посочил дека Одлуката стапува на сила веднаш. Но, во правата реченица од написот се вели дека :
„Со поединечно гласање, попладнево, пратениците, од кои 82 „за“, шест „против“ и еден воздржан, ги донесоа уставните измени.“
Што е произволна и неточна интерпретација.
Имено, процесот на уставните измени е сложен. Постапката е прецизирана во членовите 129, 130 и 131 од Уставот, каде е наведено дека:
Одлука за пристапување кон измена на Уставот донесува Собранието со двотретинско мнозинство гласови од вкупниот број пратеници.
Нацртот за измената на Уставот го утврдува Собранието со мнозинство гласови од вкупниот број пратеници и го става на јавна дискусија.
Одлука за измена на Уставот донесува Собранието со двотретинско мнозинство гласови од вкупниот број пратеници.
Измената на Уставот ја прогласува Собранието.
Што значи дека во следната фаза предлагачот на измените, во конкретниот случај Владата, треба да изготви текст на нацрт-аманманите со кои ќе се менува Уставот и да ги достави до Собранието. Во написот, инаку, се споменува дека Владата треба да го стори тоа најдоцна за 10 дена.
Меѓутоа, тука не завршува постапката. Нацрт – амандманите треба да ја поминат собраниската процедура, а за да се усвојат во парламентот потрeбни се минимум 62 гласа. Потоа следува јавна расправа за секој амандман, по што Владата ќе треба да изготви предлог-амандмани и да ги достави до Собранието. Откако тие ќе ја поминат собраниската процедура, за да бидат усвоени е потребно двотретинско мнозинство, односно најмалку 82 гласа. На крај се гласа за целиот пакет и за прогласување на уставните измени, исто така со 82 гласа.
Според прогнозите кои беа давани во овој период, очекувањата на власта се измените на Уставот да бидат направени за околу три месеци (октомври 2014). Според насловот пак, илегува дека измените на Уставот се завршена работа. Што не е точно. Вакви уставни измени можеби навистина ќе бидат усвоени, но не може отсега да се тврди дека тоа ќе биде така. Особено кога се работи за 82 пратенички гласа и за прашања околу кои е поделена и политичката и експертската јавност. Така што, од невнимание или од незнаење, е направена грешка. Или, сепак, можеби некому многу му се брзало предвреме да ги прогласи уставните измени.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
1 извор
еднострани
СЕОПФАТНОСТ
сеопфатнo
нема прикриени информации
ПРИСТРАСНОСТ
делумно прикажува вистина
не може да се утврди
лажни информации
наклонетост
политичка пристрасност,
КОМЕНТИРАЊЕ
нема коментаторски елементи
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
дезинформира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски уреден
неповрзан со тагови