Рецензија: Пораките од посетата на Нуланд
Објавено во Рецензии
on 16 - 07 - 2014 Автор: Оливера Војновска
Станува збор за новинарски производ кој со еден селективен пристап се осврнува на посетата на американскиот заменик-државен секретар за европски и евроазиски работи, Викторија Нуланд. И, притоа ги нагласува само добрите пораки. Поточно, само оние кои се во прилог на власта. (Слично како и во извештајот од посетата на Нуланд, објавен претходниот ден – 14.07.2014.) Дополнително, материјалот што го рецензираме се затскрива и зад виртуелни експерти, обидувајќи се да ја протне субјективната перцепција за неисправната политика на опозицијата, како оцена на меѓународната заедница.
Линк до оригиналниот напис: Пораките од посетата на Нуланд
Датум и време на објавување: 15.07.2014, 14:27
Датум на рецензирање: 16.07.2014
Рецензент: Оливера Војновска
ВЕЛИЧЕЊЕ НА ПРЕМИЕРОТ
Прилогот се потпира на официјалната изјава на америкаснкиот заменик-државен секретар дадена по средбата со македонскиот премиер. Меѓутоа, фокусот е ставен на моментот кога Нуланд му го честита новиот мандат на премиерот:
„Имавме искрен и отворен разговор со премиерот, сакам да му се заблагодарам на премиерот за тоа, апсолутно е круцијален моментот кога го почнува својот нов мандат… “
И, иако овој фрагмент од нејзината изјава има повеќе куртоазен тон, неговото значење во написот е предимензионирано. Па, наспроти фактот што посетата на Нуланд на Македонија е дел од нејзината поширока турнеја низ регионот и во неколку европски земји, написот е така интониран што дури прозвучува како таа да дошла специјално за да му ја честита победата на Груевски!
Впрочем, таквиот впечаток се наметнува уште во првата реченица скроена во коментаторски манир и во која се претерало со величењето на победата на премиерот и лидер на десницата:
„Таа му ја честиташе силната и уверлива победа и новиот мандат на премиерот Груевски, а го истакна и задоволството од планот за реформи на новиот владин состав“
ВИРТУЕЛНИ ЕКСПЕРТИ
Во прилогот воопшто не се споменува делот од изјавата на Нуланд во кој таа повикува на важноста на меѓуетничката хармонија, а кој го пренесоа другите медиуми.
„Ние одамна ја поддржуваме визијата на интегрирана Македонија, вие имате посебна одговорност тука во регионот да станете пример за тоа како албанската и македонската заедница заедно живеат во мир и просперитет. За тоа треба многу работа, можности за двете страни. Ги охрабруваме двете страни да работат заедно, да воспоставите златна средина за овој регион, за мирот, безбедноста, хармонијата, меѓуетничката соработка и единство, така што Македонија ќе стане посилна“
Но, затоа пак, е одвоен простор за анонимни експертски мислења во кои опозицијата се посочува како креатор на политичката криза, а пораките на Нуланд се толкуваат како „давање поддршка за работата на новата Влада“ .
НЕДОСТИГА ДИСТАНЦА
Ваквиот необјективен пристап во обработката и пласирањето на информациите прилично јасно покажува на која страна е наклонет прилогот. Видливо е дека овој политички некоректен текст, озаглавен со неинвентивен наслов, нагласено се труди да ја воспева владејачката партија и да ја стави во негативен контекст опозицијата. Што, гледано од професионален аспект, е во спротивност со принципите на етички исправно новинарство – членот 14 од Кодексот на новинарите, каде меѓу другото е наведено дека: новинарот мора да обезбеди професионална дистанца од политичките субјекти .
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални, анонимни
релевантни, нерелевантни
не може да се утврди
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
информира
некреативен
несензационален
несоодветен
јасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови