Рецензија: Кражбите на охридските плажи намалени петпати
Објавено во Рецензии
on 5 - 08 - 2014 Автор: Љубомир КостовскиВо време кога стигнуваат поразителни извештаи од охридското крајбрежје за рапидно намалениот број на туристи (види прилог во неделникот Капитал на таа тема под наслов „Охрид е попразен отколку за време на војната“), овде е објавен напис за намалување на бројот на кражбите. Белким како еден вид на утешна констатација – плажите се празни, ама се безбедни.
Линк до оригиналниот напис: Кражбите на охридските плажи намалени петпати
Датум и време на објавување: 01.08.2014
Датум на рецензирање: 02.08.2014
Рецензент: Љубомир Костовски
„Разните улични крадци и измамници на кои охридските плажи во летната сезона им е омилено место на работа, годинава останаа со кратки ракави, оти, засиленото присуство на полицијата успешно ги одби речиси сите нивни напади врз паричниците на туристите. Официјалната полициска статистика во последните три месеци забележала само пет кражби на охридските плажи“.
Од овој цитат јасно произлегува дека намалениот број на кражби на споменатите места е резултат на „засилено присуство на полицијата,“ а не на непостоење на објекти кои би биле цел на агресија на арамиите!
Лани имало 25 пријави на кражби а годинава само пет. Без обид да се направи статистичка споредба колку капачи имало лани, а колку годинава, за што, ако постоела волја можело да се дознае – барем плажите и паркинзите издаваат влезници и се сега со статистичка мерливост. Место тоа, се вели дека и за тие кражби што се случиле „најчесто станува збор за кражби извршени поради невнимание на туристите“, значи кога сите би внимавале кражби и не би ни имало.
Индикативно е инсистирањето на авторката на долг текст, бидејќи, и покрај само пет кражби се инсистира на нивна типизација, па имаме опис на вообичано ограбување на таквите невнимателни туристи – влегуваат во вода, а телефонот го остават на песокот, на пешкирот или под чадорот. Веројатно се проценува дека сите капачи имаат водоотпорни телефони! Или дека секој капач треба да обезбеди по барем еден чувар на својата облека и приватни работи?
Баналните бројки (пад на кражбите од 25 на 5) без создавање на релевантна статистичка поткрепа во текстот неколку пати се споменува како „рекордниот пад на кражби“, за нели, да се пофалат полицајците, небаре тие не се платени да го чуваат имотот на граѓаните. Се споменува дека се формирани дневни патроли и дека полицајците често седат на плажите облечени како цивили (да се надеваме дека се работи за тоа дека тие се соблечени како цивили), па, така, будно внимаваат на мирот и безбедноста на плажите. Потоа, ни се објаснува и дека патроли има и на целото крајбрежје, како и дека се делат поучни флаери и се водат „неформален разговори“ со кои се советуваат туристите да внимаваат на своите предмети. Со други зборови, на полицајците не им така лошо летово на крајбрежјето!
Не е заборавено да се истакне дека крадците не се од Охрид, туку дека доаѓаат од други градови. Немаме, се разбира, податок дали се тоа 3 од 5 или можеби дури и 4 од 5?
Добивме пример како со вакви прилози во секое зло (дебаклот на туризмот) има и доволно прилики да се пофали политиката на власта или во случајот – на некој владин ресор.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
можеби се прикриени информации
ПРИСТРАСНОСТ
не може да се утврди
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
информира
некреативен
сензационален
соодветен
јасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови