Рецензија: Исповед на малолетна проститутка: Наутро на училиште, попладне со богаташи
Објавено во Рецензии
on 25 - 11 - 2013 Автор: Соња Здравеска
Вест со сензационалистички наслов кој го манипулира читателот да помисли дека се работи за настани што се случиле во Македонија. Со повеќекратно преземање и копирање од еден на друг портал, веста губи важни елементи и овде ја имаме „осакатена“ и неверодостојна, но подеднакво сензационална.
Линк до оригиналниот напис: Исповед на малолетна проститутка: Наутро на училиште, попладне со богаташи
Датум и време на објавување: 18.11.2013
Датум и време на рецензирање: 23.11.2013
Рецензент: Соња Здравеска
Вистинитост: Од информациите содржани во веста може само да се претпостави дека тие се точни – се зборува за судот во Рим, за некаков ланец на малолетна проституција, но во текстот нема никаква референца (освен „италијанските медиуми“), ниту линк до извор кој би можел да ја зајакне веродостојноста на веста.
Извори на информации: Текстот најпрво се повикува на психијатар, кој пренесува изјава на малолетничка вклучена во проституција, дадена во истрага. Подолу во текстот се спомнува „истражител“, па е нејасно дали се работи за истиот човек, каква истрага е во прашање и кога се случила. Се добива впечаток дека користените изјави се неофицијални – дури кога ќе се провери оригиналната вест која потекнува од агенцијата АНСА, станува јасно дека изворот е всушност италијанската полиција, која објавила дел од сведочењето на девојката.
Содржајност: Веста е пренесена непотполно и површно – занемарени се „здодевните“ информации за изворите и времето кога настаните се случиле, а акцентирани и прецизно пренесени се деталите од случајот со малолетничка проституција.
Пристрасност: Вистинитоста на веста ја нарушува насловот, во кој не е наведено дека ова се случило во Италија, што го манипулира читателот и му наметнува впечаток дека се работи за настани што се случиле во Македонија.
Коментирање: Написот е пренесена вест и не содржи коментари.
Плагијат: Ова е целосно копирана агенциска вест, во која нема ниту линк до оригиналниот напис, ниту е наведен извор на информациите.
Квалитет на наслов: Клучниот проблем на оваа вест е насловот, во кој авторот, веројатно во обид да привлече повеќе луѓе да ја прочитаат веста, ја изоставува клучната информација – настанот се случил во Италија. Ова претставува манипулација со читателите.
Фотографија: Објавена е фотографија на две девојки на улица, облечени во провокативна облека, која треба да илустрира проституција. Фотографијата е стереотипна, а и несоодветна – девојките за кои се зборува во текстот не заработувале, барајќи клиенти на улица.
Говор на омраза: Текстот не дискриминира, но преку изборот на фотографијата се наметнува одреден стереотип за сексуалните работнички.
Заклучок: Ова е пример како една легитимна вест со невнимателно пренесување (копирање), се претвора во сензационалистички напис со нарушена веродостојност. Веста ја пренесоа повеќе македонски портали, но само еден од нив го наведува изворот, додека во исто време, пикантериите за малолетничката што била дел од ланецот проституција се пренесуваат прецизно и детално. На веста е ставен сензационален наслов, кој треба да привлече „кликови“ без да се наведе дека тој се однесува на вест од странство, што е недозволена пракса, но, за жал, честа во македонскиот интернет простор.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
има евидентирани извори
официјални
релевантни
2 извори
еднострани
СЕОПФАТНОСТ
несеопфатнo
ПРИСТРАСНОСТ
делумно прикажува вистина
нема извртување на вистина (спин)
нема лажни информации
не аплиактивно
КОМЕНТИРАЊЕ
нема коментаторски елементи
ПЛАГИЈАТ
целосна копија (агенциска вест)
ненаведен автор, ненаведен извор
КВАЛИТЕТ НА НАСЛОВОТ
дезинформира
некреативен
сензационален
несоодветен
јасен
ФОТОГРАФИЈА
има
несоодветна
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови