Новинарот Мамучевски избркан од седница на Советот на Општина Берово
Објавено во Актуелности
on 5 - 04 - 2016 Автор: Administrator
[Новинарот Мамучевски спречен од градоначалникот да си ги извршува обврските. Фотографија од фејсбук-профилот на Јане Мамучевски]
На 4 април 2016 година, на сопственикот на порталот „Малешевски весник“, Јован Мамучевски, на дрзок и на недозволен начин му било оневозможено да ја следи вонредната седница на Советот на Општина Берово. Причината за ваквиот чин на загрозување на правото на информирање, според Мамучевски, е фактот што тој ги критикувал локалните власти дека Берово наместо на туристички град, наликува на дива депонија поради купиштата неисчистен смет.
По повод отстранувањето на Мамучевски од вонредната седница на Советот на Општина Берово, тој на својот ФБ-профил напиша:
„Денеска се случи невидена дискриминација од страна на градоначалникот на Берово, Драги Наџински, кон новинарот Јане Мамучевски. Срамно. По покана на претседателот на Советот на Општина Берово да присуствувам на вонредната седница на која како единствена точка беше состојбата на комуналното претпријатие ЈКПР „Услуга“, кои веќе трети ден штрајкуваат и како што е познато Берово наликува на дива депонија наместо на туристичко место. Јас добив официјална покана и отидов и на самиот влез советниците беа и од двете политички партии. Јас одам да влезам во собранието и обезбедувањето ме запира, ми бара дали имам акредитација, му велам да присуствува на совет може секој граѓанин и самите совети се јавни, но еве ќе ти дадам акредитација. Во тој момент претседателот на советот на тој вработен му рече дека може да присуствувам, но вработениот не сакаше да му пушти и по мобилен го побара градоначалникот Драги Наџински, а тој нервозно кажа дека за мене оваа институција е забранета, што претставува еден вид дискриминација, односно попречување на слободата на информирање. Фасциниран сум од злобата и арогантноста на градоначалникот кон лице кое само ги извршува професионалните новинарски стандарди. Јас, Јане Мамучевски, сега ги информирам сите новинарски здруженија, невладини организациии, сите локални и регионални медиуми бидејќи ова е преседан. Вака ли ќе се бориме за регулација на медиумите?“
Извор: НВО Инфоцентар