Рецензија: Затворени избирачките места-изборите фер и демократски
Објавено во Рецензии
on 17 - 04 - 2014 Автор: Владимир Мирчески
Во овој текст се гледа како со малку може многу да се расипе. Нешто слично како во готвењето – кога ќе се земе готов, проверен рецепт и наместо да се оди само по него, со ставање на еден единствен дополнителен зачин целото јадење ќе излезе лошо. Така е и во конкретниот пример: сѐ било веќе направено и готово, но некој турил само една мирудија и сѐ се измешало.
Линк до оригиналниот напис: Затворени избирачките места-изборите фер и демократски
Датум и време на објавување: 13.04.2014, 19:05
Датум на рецензирање: 14.04.2014
Рецензент: Владимир Мирчески
ЧИЈА Е ОЦЕНКАТА ЗА ИЗБОРНИОТ ДЕН?!
Таа претходно спомената „мирудија“ овде многу повлијаела врз вистинтоста. Зошто? Затоа што се тврди нешто што со ништо не е аргументирано во текстот. Попрецизно: земен е готов текст и е „ископиран“ од збор до збор со исклучок на насловот кој, покрај „Затворени избирачките места“ конкретно е „зачинет“ со формулацијата „-изборите фер и демократски“ и со тоа е направена грешката. Прво, затоа што подолу во написот нема ништо што се однесува на степенот на демократичност на изборниот ден, а второ, зашто таквите оценки треба да ги дадат надлежните органи, учесниците во изборниот процес, набљудувачите, а не некој новинар туку-така да „накалеми“ силна констатација, притоа не повикувајќи се на ништо. Тоа јасно ни кажува дека спорниот дел од текстот, односно насловот, нема извори на информации, додека преостанатото, кое, всушност е пресликана агенциска вест, што е јасно нотирано, е апсолутно коректно зашто се споменуваат и извори и факти и ни нуди добра содржајност од аспект на: затворање на избирачки места, на колку места се гласало, кои биле кандидатите за претседател, каков бил одзивот, каква е натамошната правна процедура итн…
НАКАЛЕМЕНА КОНСТАТАЦИЈА ЗА ИЗБОРНИОТ ПРОЦЕС
Употребената „натурена“ насловна конструкција, не одговара на содржината на текстот, а со тоа може и да влијае на вкупниот впечаток кај публиката за изборниот ден. Како само 5 минути по затворањето на избирачките места се тврди дека „изборите се фер и демократски“ пред тоа да го кажат и надлежните и засегнатите. А, како што веќе се виде, дел од учесниците апсолутно не ја делат оценката дека сѐ поминало во најдобар ред. Значи, насловот е тоа што не е во ред и не ја исполнува основната задача: да информира.
„Идејата на насловот во голема мерка треба да зависи, да извира од текстот на кој се однесува, да соодветствува на податоците, гледиштата на текстот“ – Новинарски жанрови.
Нејасно е дали „дополнувањето“ во насловот било намерно или, пак, случајно истрчување, бидејќи таквата формулација може да упатува на одредено ниво на пристрасност на инаку, ќе повториме, коректната агенциска вест која е искористена како основа.
Затоа, ќе кажеме дека ова е пример, кој треба да се искористи во новинарските книги за тоа како, без потреба, или пак објаснување, може добра вест да се „зафркне“ со само три зборови и сврзник вметнати во насловот.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
веродостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
повеќе извори
повеќестрани
СЕОПФАТНОСТ
сеопфатнo
нема прикриени информации
ПРИСТРАСНОСТ
делумно прикажува вистина
највероајтно да
не може да се утврди
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
целосна копија со свој „додаток“
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови