Рецензија: Стејт департмент: Македонија генерално ги почитува верските права и слободи
Објавено во Рецензии
on 1 - 08 - 2014 Автор: Оливера Војновска
Прилогот насловен: „Стејт департмент: Македонија генерално ги почитува верските права и слободи“, само површно се осврнува на Извештајот за верските слободи во светот во минатата година, во делот за Македонија. Овој скуден материјал спакуван во четири реченици не ја пренесува главната поента од Извештајот: „дека во Македонија се политизираат религијата и верските прашања“. Се добива впечаток како прилогот да е направен колку за да помине редот. Но, ваквиот начин на пласирање и обработка на текстот не е поради незнаење или неискство, туку сосема е извесно дека Извештајот намерно добил таков третман.
Линк до оригиналниот напис: Стејт департмент: Македонија генерално ги почитува верските права и слободи
Датум и време на објавување: 29.07.2014, 11:42
Датум на рецензирање: 29.07.2014
Рецензент: Оливера Војновска
ПРЕМОЛЧУВАЊЕ И МАРГИНАЛИЗАЦИЈА НА КРИТИКИТЕ
Прилогот се повикува на официјален документ, меѓутоа податоците ги прикажува на еден исклучително селективен начин. Имено, оваа куса информација целосно ги игнорира сериозните критики упатени на адреса на власта, поточно на владејачката партија од македонскиот блок:
… владејачката коалиција во која доминира македонска партија со православна ориентација ја политизира верата за нејзини сопствени политички цели, повикувајќи се на верските уверувања и идентитетот на мнозинството во земјата и со помош на МПЦ.
Исто така, во неа нема ниту збор за тоа дека:
Етничките тензии негативно се одразуваат врз верските слободи. Политизацијата на верските прашања е во пораст и има негативен ефект врз верската толеранција во земјата.
Стејт департментот нотира дека имало извештаи за социјални злоупотреби и дискриминација врз основа на верска определба, вера или практика.
Членовите на Православната Охридска архиепископија, која има околу 100 членови, но е признаена од Српската православна црква како единствена легитимна автономна црква во Македонија, тврдат дека се изложени на медиумски напади и набљудување од страна на владата, поради нивното одбивање да ја прифатат независноста на МПЦ-ОА од СПЦ.
Некои во муслиманската заедница тврдат дека и ИВЗ профитира од блиските врски со владата.
Во прилогот не се споменува ништо за тоа дека во извештајот на Стејт департментот е нотиран спорот на Бектешката заедница на Македонија против Исламската верска заедница, околу Арабати Баба Теќе во Тетово, а притоа се оценува дека тоа што Бектешката заедница сѐ уште нема признат статус во Македонија ја оневозможува во водењето на спорот за Теќето.
Наспроти ваквите согледувања во годишниот извештај, текстот што го рецензираме само бегло ги споменува забелешките за МПЦ и ИВЗ и со насловот испраќа порака како во документот на Стејт департментот да не се забележани проблематични аспекти на верските права и слободи. Што прилично јасно укажува на која страна натежнува прилогот.
Со премолчувањето и маргинализација на суштинските забелешки, на јавноста ѝ се ускратува можноста да биде објективно информирана. Истовремено, направена е и сериозна повреда на новинарскиот Кодекс , при што се прекршени преамбулата каде е нагласено дека „основна задача на новинарите е да ја почитуваат вистината“, како и првиот амандман, каде, меѓу другото, е посочено и дека „новинарот нема да прикрива суштински податоци.“
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
точни наводи
делумно
ИЗВОРИ НА ИНФОРМАЦИИ
има евидентирани извори
официјални
релевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
нема коментаторски елементи
ПЛАГИЈАТ
не може да се одреди
ненаведен автор
КВАЛИТЕТ НА НАСЛОВОТ
не информира
некреативен
несензационален
несоодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови