Рецензија: Бебе се бори за живот, затруено од престој во градинка во Штип
Објавено во Рецензии
on 13 - 02 - 2014 Автор: Владимир МирческиПроблематичноста на овој текст има една, но навистина голема димензија. Станува збор за туркање, по секоја цена, на информација која, всушност, во самиот напис е демантирана од надлежните. Овде немаме пример на дознавање на сензитивна политичка информација која, поради нејзината природа, би било многу тешко „100%“ да се провери, туку за вест која „нема каде да бега“. Значи имаме или немаме отруено дете кое, како што се вели, се бори за својот живот?
Во овој текст упорно, и без солидни новинарски огради, се тврди првото, иако кредибилен извор јавно кажува дека тоа не е така. И само по неколку часа се докажува токму спротивното од напишаното во текстот – дека нема затруено бебе и дека неговиот живот не е загрзоен, туку дека детето превентивно било хоспитализирано поради стравување дека можеби нешто голтнало. Значи, класична дезинформација на јавноста!!!
Линк до оригиналниот напис: Бебе се бори за живот, затруено од престој во градинка во Штип
Датум и време на објавување: 11.02.2014, 10:45
Датум на рецензирање: 11.02.2014
Рецензент: Владимир Мирчески
Вистинитост: Токму во овој елемент текстот не го „минува испитот“. Вистината е тотално промашена, бидејќи едно е бебето да се отруло и неговиот живот да е сериозно загрозен, а сосема друго е дека детето не било затруено, туку „за секој случај“ поради страв дека можеби изело нешто што може да е отровно, е пренесено во болница. Пласирајќи ја веста во оваа форма написот се судира со членот 1 од Кодексот на новинарите кој вели дека:
„Новинарот треба да објавува точни, проверени информации и нема да прикрива суштински податоци и да фалсификува документи.
До колку информацијата не може да се потврди, или станува збор за претпоставка, односно шпекулација, тоа треба да се каже и да се објави.
Точноста на информацијата треба да се провери колку што е тоа можно“.
Можам да го разберам поривот да се биде прв во објавувањето на информацијата, но брзината паѓа во вода ако кажаното, како во овој случај, не е вистинито.
„Петнаестмесечно бебе е хоспитализирано во тешка состојба откако конзумирало непозната супстанца во детска градинка во Штип каде престојувало. Се претпоставува дека детето е затруено со отров за глувци бидејќи пред инцидентот во градинакта била вршена дезинфекција, дератизација и дезинсекција“.
А, вистината, по извесен период е објавена на низа други медиуми, вклучувајќи го и оној кој го пласираше овој напис.
Извори на информации: Тука доаѓаме до најчудниот дел. Има јасен и кредибилен извор – цитиран е директорот на градинката каде детето престојувало, кој прецизно го опишува случајот од почетокот до крајот, што конечно го потврдуваат и од Клиниката за детски болести во Скопје. Значи, иако изворот вели едно, целиот тек на текстот е свртен во спротивната насока. Зошто? Најверојатно поради новинарски сензационализам.
Содржајност: Ја има, но е погрешно пласирана. Направена е „каша-попара“ – ситуација која подоцна се „спасува“ со објавување на вистинската информација. Ваквиот тип текстови, кои имаат елементи на црна хроника или на семејни трагедии, публиката буквално „ги голта“. Но, овојпат залакот е „утка“.
Оригиналност/Плагијат: Не е наведен авторот на текстот, но понуденото, особено изјавата на директорот на градинката, како да упатува на тоа дека станува збор за оригинален текст.
Квалитет на насловот: И во овој сегмент има големо потфрлање, бидејќи насловната конструкција е ултрасензационалистичка, а всушност е искривување на вистинската информација која во самиот текст ја кажува главниот извор.
Фотографија: Фотографијата не го лоцира местото каде се „случил“ настанот – градинката, штипската болница или, пак, скопската клиника. Значи „сликата“ нема информативно, туку повеќе илустративно значење.
Заклучок: Кусо за резимирање – пред нешто да се објави, особено на влијателен медиум, треба добро да се провери, особено кога станува збор за чувствителна информација. Во овој случај навистина важи она: „Два пати мери, еднаш сечи“.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
официјални
релевантни
1 извор
повеќестрани
СЕОПФАТНОСТ
има информација, но таа е извитоперена
нема прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
не аплиактивно
КОМЕНТИРАЊЕ
нема коментаторски елементи
ПЛАГИЈАТ
најверојатно е оригинал
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
нејасен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
средно читлив
солидни мултимедијални елементи
нема контекстуални линкови
делумно стилски уреден
неповрзан со тагови