Рецензија: Политика 2015: експертите очекуваат помирна година
Објавено во Рецензии
on 12 - 01 - 2015 Автор: Оливера Војновска
Прилогот што е пред нас на гледачите им подметнува една необјективна прогноза за политичките случувања во годината што почна (2015). Материјалот како да е наменски скроен за да се фали власта: дека е посветена на подобрување на благосостојбата на граѓаните, на намалувањето на невработеноста, дека носи странски инвеститори, а, исто така, таа е заслужна и за релаксираната политичка клима во државата! Дури, впечаток е дека е направен таков избор на експертите за да ја потврдат саканата поента. И притоа, нивното мислење се издигнува на ниво на целата експертска јавност, што е навистина претенциозно.
Линк до оригиналниот напис: Политика 2015: експертите очекуваат помирна година
Датум и време на објавување: 08.01.2015, 18:23
Датум на рецензирање: 09.01.2015
Рецензент: Оливера Војновска
АХ, ТАА ОПОЗИЦИЈА!
Прилогот посочува прецизни извори на информации, но тие се еднострани. И двајцата експерти во јавноста се познати по нивните настапи во кои покажуваат јасна наклонетост кон партијата на власт.
Во таков тон се нивните изјави и во материјалот што е предмет на оваа рецензија. Професорката Додовска, на пример, на самиот почеток го вперува прстот во опозицијата како главен кочничар на севкупниот прогрес, со надеж дека таа, сепак, ќе се вразуми, за потоа да ѝ тргне напред и на државата!
„Очекувам дека опозицијата конечно ќе сфати дека овој недоглед и ова инаетење во кое се заглави подолг временски период не водат кон ништо добро, и оттаму ќе видиме еден постабилен политички и општетствен развој на државата, како и почитување развивање и унапредување на демократските институции“ (0,12 минута)
НАПЛИВ ДА Ѝ СЕ УГОДИ НА ВЛАСТА
Вториот аналитичар (Пандов), пак, прогнозира дека ќе има промени на кормилото на СДСМ, а во исто време, тој нема никакви дилеми дека лидерот на ВМРО-ДПМНЕ ќе добие уште еден мандат да ја води партијата.
„Во мај, на Конгресот на ВМРО-ДПМНЕ недвојбено повторно ќе биде избран господинот Никола Груевски…“ (1,30 минута)
„Кај СДСМ очекувам промени. Можеби на почетокот сосема спонтано, но подоцна ќе прерасне во сѐ посилно и посилно движење, кое ќе прерасне во голем протест и на крајот ќе донесе до промени на двоецот Заев-Шеќеринска и таму ќе дојде таму некој нов помлад лидер со свежи идеи“ (1,45 минута)
Ставовите на споменатите експерти ѝ даваат право на авторката на прилогот уште во првата реченица да констатира дека во 2015 година ќе има „намалена тензија меѓу партиите и солидна политичка дебата“. Сепак, имајќи ги предвид исклучително затегнатите политички односи во државата (власт–опозиција), ваквото предвидување изгледа некако исфорсирано и нереално.
Всушност, констатацијата е ставена во функција да креира перцепција дека власта создава позитивен политички амбиент. Таква е и пораката од насловот, кој е целосно неинвентивен: „Политика 2015: експертите очекуваат помирна година“.
И иако во заклучокот на прилогот се вели дека „експертската јавност верува дека во 2015-та ќе има уште поголем влез на странски инвестиции, а со тоа и постепено решавање на најгорливиот проблем невработеноста“, ваквите наводи не може да се чујат во изјавите на двајцата аналитичари.
Тие се неаргументирани и произволно нафрлени, веројатно во напливот да ѝ се угоди на власта. Тоа дополнително говори за (не)квалитетот за овој новинарски производ во кој затаиле принципите на професионалното новинарство.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
делумно
делумно
ИЗВОРИ НА ИНФОРМАЦИИ
има евидентирани извори
официјални
2 извори
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
нема лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
наведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
нема
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
изјавите на гостите не се транскрибирани
солидни мултимедијални елементи
нема контекстуални линкови
делумно стилски уреден
неповрзан со тагови