„Фото-одбрана“ со пристрасни коментари не е одбрана
Објавено во Рецензии
on 12 - 01 - 2017 Автор: Александар Пешев
[Рецензија: ШТО ПРАВЕШЕ ГРУЕВСКИ ВО МАВРОВО: Додека опозициските медиуми лажеа дека бил на преговори со Џафери, еве што се случуваше во Маврово!]
Тенденциозниот наслов е соодветен на содржината на непрофесионалниот текст со фотографии кои се употребуваат за своевиден спин, поточно извртување на вистината за темата која е предмет на интерес.
Линк до оригиналниот напис: ШТО ПРАВЕШЕ ГРУЕВСКИ ВО МАВРОВО: Додека опозициските медиуми лажеа дека бил на преговори со Џафери, еве што се случуваше во Маврово!
Датум и време на објавување: 04.01.2017
Датум на рецензирање: 10.01.2015
Рецензент: Александар Пешев
ЦЕЛО ВРЕМЕ ЛИ ШЕТАЛЕ ПО СНЕГОТ?
Преку насловот се тврди дека „опозициските медиуми лажеа дека лидерот на ВМРО-ДПМНЕ бил на преговори со Муса Џафери“. Спорно за ваквиот вид известување преку фото-докази е следново: Дали е исклучена можноста од одредени активности само затоа што се презентирани серија фотографии од Груевски во дадена доба од денот. Поконкретно, на читателот му останува нејасно:
- Дали за време на целиот престој, лидерот на ВМРО-ДПМНЕ престојувал со семејството?;
- Кои се тие опозициски медиуми кои се прозвани за лажење?;
- Зошто нема официјална изјава од Груевски или Џафери околу нивните наводни активности?;
- Како само со фотографиите е утврдено дека одредени медиуми лажат?
Можеби најсуштинското прашање е зошто е составена објавата? Се создаваат сомнежи за политичка пристрасност на текстот, токму поради тоа што медиум се става во функција на демантирање други медиуми.
Авторството на фотографиите не е наведено, со што останува отворено мошне проблематичното прашање дали е обезбедена согласност од родителите за фотографирање на малолетни лица?
ОДБРАНА ЗА СВРТУВАЊЕ НА ВНИМАНИЕТО?
Ненаведениот извор на фотографиите дополнително создава сомнежи дека медиумот се користи за лична промоција на лидер на политички субјект за да се оттргне вниманието од одредени настани, а текстот кој се наоѓа под фотографиите оди во прилог на ваквите сомнежи:
„Груевски со своето семејство новогодишните денови ги помина во Маврово каде што се одмараше и поминуваше квалитетно време со своите најблиски“.
Коментаторските елементи, вплетени во единствениот факт дека експремиерот бил излезен со семејството, се јасно забележливи, што сведочи за едностраноста на текстот:
„И додека опозициските медиуми спинуваа дека Груевски деновите во Маврово ги поминува преговарајќи со Муса Џафери, лидерот на ВМРО-ДПМНЕ во суштина уживаше во снежните денови со своите ќерки Анастасија и Софија“.
Не се појаснува зошто Груевски би се среќавал со Џафери, а отсуството на извори на вакви тврдења, барем преку линкови до прозваните медиуми, го прави текстот несеопфатен.
Сè на сè, имаме непрофесионална еднострана објава со коментари кои не се издвоени од единствениот факт, спинуван на начин на кој се брани посочен политичар од наводни напади од неименувани медиуми.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
има факти
не може да се утврди точноста на наводите
не може да се утврди веродостојноста на наводите
ИЗВОРИ НА ИНФОРМАЦИИ
нема евидентирани извори
не може да се утврди
СЕОПФАТНОСТ
несеопфатнo
можеби се прикриени информации
ПРИСТРАСНОСТ
делумно прикажува вистина
извртување на вистина (спин)
не може да се утврди
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
наведен автор и извор без линк
КВАЛИТЕТ НА НАСЛОВОТ
не информира
некреативен
сензационален
соодветен
тенденциозен
ФОТОГРАФИЈА
има
соодветна
ни манипулира ни информира - ставена е само како илустрација
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
стилски уреден
неповрзан со тагови