Рецензија: Нема Македонци во Европа! Вели мапата на Карл Билт
Објавено во Рецензии
on 13 - 03 - 2015 Автор: Зоран Бојаровски
Во право, сосема во право, е читателот на „Сервис за проверка на фактите од медиумите“ кога, предлагајќи ја оваа медиумска содржина за рецензија, вели: „…мапата не ја нацртал Карл Билт, туку некој друг …, само ја споделил. Сигурно не ја проверувал колку е точна.“
Тоа е сосема точно зашто мапата изворно е објавена на социјалната мрежа „Редит“ (Reddit), а потоа и на „Брилиант мапс“ (Brilliant Maps), од каде што пристигнала преку ретвит на твитер-профилот на Карл Билт. „Редит“ е социјална мрежа на која корисниците споделуваат содржини во различни категории, а потоа членовите на таа заедница гласаат и дебатираат за таа содржина. Веб-страницата нема никакви научни, ниту, пак, политички претензии за некаква точност и само така треба да се гледаат тие содржини, иако се прилично читани. Интересно, слично како и коментарот на Билт.
А, твитот на Карл Билт не вели ништо друго освен:
European nations according to second largest nationality within them. Interesting.(Европските држави според втората најголема националност. Интересно.)
Но, на медиумот, чија содржина ја рецензираме, тоа му е најмалку битно. Она што е очигледно е дека авторот на оваа содржина реагира на клучни зборови. Во овој случај, налетале на активациската мотивација „Карл Билт“ и ја стартувале својата „вистина“ за профилот на шведскиот политичар.
Линк до оригиналниот напис: Нема Македонци во Европа! Вели мапата на Карл Билт
Датум и време на објавување: 11.03.2015 23:57
Датум на рецензирање: 11.03.2015
Рецензент: Зоран Бојаровски
За да ја оправдаат својата постапка, авторите на овој текст, прво ни нудат еден мини-портрет за Билт, се разбира сосема едностран, а со тоа и прилично проблематичен од професионален етички аспект: Бил познат застапник на растурањето на Југославија… Подржувач на акциите на муџахедините и на албанските паравојски во Косово и во Македонија… Како резултат на политиките на Билт и неговите истомисленици, ние во регионот сме во примирје кое ќе трае додека трае…
Во една таква рамка потоа е ставена целата содржина во која ниту еден елемент поврзан со мапата и со Билт – не е точен.
Констатиравме дека мапата не е на овој политичар, па така паѓаат во вода сите реченици што почнуваат со „Според Билт…“, „Мапата на Билт“, „Според него“. А, речиси цел текст, во прв план го става Билт како автор и виновник за оваа мапа.
Настрана сите останати „гревови“ што му се припишуваат на шведскиот дипломат, во однос на коментарите за Македонија, мапата и за Билт, ќе се послужиме со коментарот на нашиот читател кој ни предложи да ја рецензираме оваа содржина. Тој вели:
„Карл Билт бил (ли е, м.з.) тој што рекол дека нема Македонци во Европа затоа што не биле признати Македонците во Бугарија и во Грција!? Политиката на тие земји кон Македонците е апсолутно за осуда, ама Карл Билт не е вмешан во неа.“
Завршуваме со насловот на овој текст кој е, исто така, сосема несоодветно и без аргументи изведен. Имено, уште еднаш: Ниту мапата е на Билт, ниту, пак, каде било тој вели дека во Европа нема Македонци.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
неточни наводи
неверодостојни наводи
ИЗВОРИ НА ИНФОРМАЦИИ
нема евидентирани извори
СЕОПФАТНОСТ
несеопфатнo
прикриени информации
ПРИСТРАСНОСТ
делумно прикажува вистина
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
оригинално дело
ненаведен автор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
соодветна
манипулира
ненаведен автор(извор)
ГОВОР НА ОМРАЗА
навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
не апликативно
нема контекстуални линкови
делумно стилски уреден
неповрзан со тагови