[Рецензија: НЕКОЈ САКА ДА ПОСТАВИ ТАРАБУКА НА ЧЕЛО НА ВМРО-ДПМНЕ: Опозициски новинар и амбасадорот на ЕУ ги откриваат намерите!]

Ексклузивен текст  –  разоткривање на наводен заговор против лидерот на владејачката партија за негова смена, при што како главни темели за тезата се користат прашања на новинари, а за извори на информации се земаат луѓе од општински комитети на ВМРО-ДПМНЕ. Професионално, нема што!!!

Линк до оригиналниот напис: НЕКОЈ САКА ДА ПОСТАВИ ТАРАБУКА НА ЧЕЛО НА ВМРО-ДПМНЕ: Опозициски новинар и амбасадорот на ЕУ ги откриваат намерите!

Датум и време на објавување: 24.10.2016

Датум на рецензирање: 25.10.2016

Рецензент: Владимир Мирчески

  ТЕЗИ НА СТАКЛЕНИ НОЗЕ  

Текст со сериозно „заговорничко“ сценарио за наметнување друг лидер на владејачката партија – однадвор. Но, по читањето на написот, станува јасно дека тезите се држат на „стаклени нозе“. Покрај тоа, гледано од содржински аспект, материјалот скока од едно на друго поглавје во т.н. приказна, па затоа е неопходна анализа сегмент по сегмент.

СЛАБА АРГУМЕНТАЦИЈА

Прашањата до Никола Груевски поставени од две новинарки за тоа дали има план да биде дел од кандидатските листи за претстојните избори, веднаш се квалификуваат како дел од опозициско-странски план за негово детронизирање од врвот на ВМРО-ДПМНЕ. Ќе ја тргнеме настрана моралната одговорност дали некој сам требало да се тргне од политичката сцена по таков скандал со незаконско прислушување и ќе се фокусираме на тоа кон што цели рецензијата – низ новинарски очи да ги разголи елементите на написот. Прво, недозволиво е лепење етикети на медиуми зашто поставуваат незгодни прашања до експремиерот.

„Кога ваквото прашање доаѓа од опозициски медиум/новинар, а паралелно СЈО до сега покренува обвиненија само кон функционери на една политичка партија, станува јасно дека има сериозна политичка мотивираност зад обвиненијата кои ги покрена до сега ова јавно обвинителство“.

Па, не може да паѓаат само местенка-прашања како шутирање пенал на празен гол. Второ, за тезата дека обвиненијата на СЈО се строго селективни зашто биле поднесени против функционери на власта… Мислам, логично е, па ВМРО-ДПМНЕ повеќе од 10 години е на власт и ги управува органите на државата меѓу кои и МВР и УБК. Инаку, полното име на СЈО е „Јавно обвинителство за гонење кривични дела поврзани и кои произлегуваат од содржината на незаконското следење на комуникациите“.

ИЗВОРИ?!

Како написот проверува дали Груевски има добар рејтинг и заслужува да остане лидер? Преку изјава од анонимен функционер на ВМРО-ДПМНЕ.

„Ние контактиравме еден претседател на општински на ВМРО-ДПМНЕ, кој вели дека им пречи тоа што Груевски е популарен и дека направиле се да го дискредитираат, но народот едноставно му верува затоа што работи и остварува од збор до збор, а народот знае дека може да се потпре на него и не прифаќа уцени кога би се барало нешто од него“.

Веродостојно, навистина, а зошто не го прашале самиот Груевски за неговиот партиски рејтинг и дали би сакал да види друг на неговото место.

СПИН

Ситуацијата со Никола Груевски, кој е обвинет за сериозно кривично дело, се споредува со таа на Никола Саркози или Хилари Клинтон.

„Прашањето инаку инспирирано од изјава на Амбасадорот на ЕУво Македонија, истото треба да го насочи и кон Хилари Клинтон или Никола Саркози и ред други политичари за кои имаше сериозни сомневања за можни злоупотреби на функциите“.

Состојбите се сосема поинакви и затоа ваквата споредба не држи вода.

КОМЕНТАР

Исто така, имаме мешање на жанрови – ем извештај, ем коментар:

„Ваквото потценување на јавноста е нешто што е карактеристично за СДСМ и сме го виделе во повеќе наврати.

 

Веќе станува и комичен начинот на кој СДСМ сака да ја избегне волјата на народот и да направи работи кои се против државата“.

Под параванот дека на  јавноста  ѝ  се нуди чиста информација, всушност се подметнува  субјективно мислење.

Ваквата постапка се коси со професиналните новинарски стандарди:

Новинарот треба да прави разлика меѓу фактите и мислењата, меѓу веста и коментарот – член 13 од Кодексот на новинари.

И,  на крајот, се добива впечаток дека стравот за „престолот“ на владејачката партија бил мотивација, но и движечка сила за оваа „одбрана пастирова“.