[Рецензија: СЕ РАСПАЃААТ: „СДСМ пропаѓа, тоа ми се допаѓа“ е главна тема на социјалните мрежи денес!]

Класична црна реклама. Искористена е тривијална ситуација за врз основа на неа да се „изгради“ општ заклучок за распад на најголемата опозициска партија. Расклатена табла не може да биде дефинитивен и апсолутен сигнал за „расклатена“ опозиција, барем не во вистинското новинарство. Колку некој да сакал да е така, еден или два „клинци“ повеќе или помалку не се реален одраз за кондицијата во која се наоѓа политичкиот противник.

Линк до оригиналниот напис: СЕ РАСПАЃААТ: „СДСМ пропаѓа, тоа ми се допаѓа“ е главна тема на социјалните мрежи денес!

Датум и време на објавување: 06.09.2016

Датум на рецензирање: 09.09.2016

Рецензент: Владимир Мирчески

СВЕТЛЕЧКАТА РЕКЛАМА ИЛИ СДСМ ПРОПАЃА ШТО ТОЛКУ НЕКОМУ МУ СЕ ДОПАЃА?!

Фотографии, таблоидски, што „тераат“ на жолто, секако дека заслужуваат внимание на јавноста, барем на еден дел од неа, зашто објективно ситуацијата е интересна. Светлечка реклама на општинска организација на СДСМ, и тоа во Скопје, како „виси на конец“ е занимливост, новина што е тема на муабет, особено меѓу припадниците на владејачката партија. Значи, од новинарска гледна точка, нема спорно во нејзиното објавување како некаква фото-вест. Проблематичен е текстот со кој оваа информација е проследена.

„Деструкцијата и антидржавното однесување ја доведе СДСМ до распаѓање – за тоа говори и светлечката, односно висечката таблата на ОО на СДСМ во Центар која виси на „клинец“ и се потпира на таблата на ВМРО-ДП за да не падне“.

Прво, станува збор за генерализација – не знам како може од состојбата на една табла да се суди за внатрепартиската ситуација во СДСМ. Основната логика, а камоли професионалното новинарско расудување, јасно кажува дека тоа е ситен елемент, во случајов небитен детаљ, за таков остар заклучок. Врз основа на други далеку посериозни фактори, може и смее да се суди дали некоја партија се распаѓа или не. Паднала или висела една светлечка реклама не е одлучувачки критериум за аргументирање на такви остри формулации.

Второ, очигледно е дека овој „новинарски“ производ е коментар. Кој тоа вели дека опозицијата е „деструктивна и антидржавна“? Извори, соговорници, истражување или, пак, тој што го напишал кусиот црн текст „налепен“ на серијата фотографии, несоодветно искористени за генерализирање на политичките состојби.

Новинарот треба да прави разлика меѓу фактите и мислењата, меѓу веста и коментарот, посочува членот 13 од Кодексот на новинари.

Иако се прави обид, би кажал привиден, дека текстот само пренесува фејсбук-статуси, дискутабилно е колку од тие се автентични објави на поединци, а колку организиран „труд“ на партиски центар за комуникации и јасно е дека тој не е обичен трансмитер на „зборувањата“ на социјалните мрежи. Не, написот е класичен „носач“ на позиција, материјал што треба да покаже дека СДСМ се распаѓа преку примерот на висечката светлечка реклама и тоа во ситуација на предизборен период, со оглед на тоа што предвидениот термин за одржување на предвремените избори е 11 декември.

Известувањето од политичките процеси, особено од изборите треба да биде непристрасно и избалансирано.Новинарот мора да обезбеди професионална дистанца од политичките субјекти, вели членот 14 од кодексот на новинари.

Оттука, прашањето е чија е таа позиција што ја кажува овој напис: индивидуална, на дел од фејсбук-заедницата или партиска?!