[Рецензија: „Независниот“ Чичаковски од ДИК на брифинг со заменик-министерот Николовски од СДСМ]

Текстот е несодржаен и необјективен од почеток до крај. Правен е со идеја да го дискредитира претседателот на Државната изборна комисија (ДИК) и да ја стави под прашалник неговата професионалност. Но, притоа се заборавило дека ДИК е независно тело и самото одлучува за својата работа, a нејзиниот претседател може да се среќава со кого сака во слободно време. Тоа воопшто не значи дека тој не е професионален. Напротив, неговата професионалност се гледа во работата на ДИК, во нејзините одлуки и во нејзината доверба кај граѓаните.

Линк до оригиналниот напис: „Независниот“ Чичаковски од ДИК на брифинг со заменик-министерот Николовски од СДСМ

Датум и време на објавување: 4.09.2016, 17:38

Датум на рецензирање: 06.09.2016

Рецензент: Владо Ѓорчев

 

ОБВИНУВАЊА ВО ФОРМА НА ПРАШАЊЕ

„Дали на средбата меѓу Чичаковски и Николовски се зборувало за тоа како е можно после сите измислици на СДСМ списокот на гласачи да е речиси идентичен како тој во 2014 година, или тројцата сосема случајно се нашле на иста маса, во моментов е непознато, пишува Пресс24“.

Ова е дилемата што ја наметнува текстот. Сепак, се заборава дека новинарството треба да нуди одговори, а не да прашува. Еве, на пример, ние би го одбрале одговорот под два, дека сосема случајно се нашле на иста маса. Кога веќе текстот ни нуди опција за избор, тоа е нашата. Можно ли е да е така? Секако дека е. Како можело да се провери тоа? Ако тој што фотографирал, наместо да бега, ги прашал. Тогаш дилемата што ја поставува текстот, наместо да ја загатнува без да ја одгатне, би била решена. Сепак, и да било така, тоа немало да го спречи појавувањето на овој текст. Причината е едноставна. Текстот морало да излезе ваков, затоа што тоа му е намената – да го омаловажи претседателот на ДИК.

Издржана новинарска содржина не смее да манипулира со паушално нафрлени обвинувања, без да понуди докази за искажаните наводи. Исто така, професионалниот новинарски пристап не дозволува да се изнесуваат критики за нечија стручност и компетентност (во конкретниот случај, ДИК), без притоа да има вистинска и издржана потврда за тоа.

„Самиот Чичаковски, кој на фотографиите делува дека не е премногу воодушеден што некој го фотографира во друштво на Николовски и Милев, за себе тврдеше дека е „независен експерт“, а не партиска инсталација на СДСМ во ДИК, иако дел од медиумите објавија фотографии на кои се гледа Чичаковски во младоста во првите редови на митинг на Бранко Црвенковски“.

ОПА! СЕ ВМЕШУВА И ПСИХИЈАТРИЈАТА!

Текстот во еден момент навлегува и во емоционалната состојба на Чичаковски. Па, како психијатар, оценува дека тој не бил премногу воодушевен (како ли е кога некој е премалку воодушевен?). Што се однесува на тоа дека неговата независност се става на маса, мора да се истакне дека независниот експерт Александар Чичаковски е прифатен од сите четири политички лидери, потписници на Договорот од Пржино. Не постои изјава од претседателот на ВМРО-ДПМНЕ, Никола Груевски, во која тој вели дека Чичаковски е лош избор.

Напротив, телевизија „Телма“ на 16 декември 2015 година извести:

„Лидерите на ВМРО-ДПМНЕ, СДСМ, ДУИ и ДПА, Никола Груевски, Зоран Заев, Али Ахмети и Мендух Тачи, на вчерашната средба во Клубот на пратениците постигнаа договор за целосниот состав на ДИК.

– Препорачуваме Парламентот да ги назначи Реџеп Прекопуца, Атанас Урумов и Александар Чичаковски за независни експерти во ДИК. Го покануваме Парламентот да ги финализира неопходните постапки што е можно побрзо, со цел ДИК да започне со својата работа и да ги преземе своите должности за подготовка на веродостојни избори и да придонесе за создавање рамноправни услови во предизборието, се наведува во заедничката изјава на четворицата лидери објавена по средбата“.

СЕ ВАДАТ И СТАРИ ФОТОГРАФИИ

Текстот продолжува и завршува во истиот стил. Се вадат стари фотографии на кои, наводно, Чичаковски е на митинг на СДСМ (како да е тоа забрането). Се манипулира со бројки дека избирачкиот список воопшто не е променет, иако не се кажува дека 170.000 гласачи ќе бидат ставени на посебен список. Текстот е преполн со коментари кои не се издвоени, туку интегрирани во него.

Ова е текст за пропаганда. Тоа, пак, воопшто не е намерата и смислата на новинарството. Новинарството значи стандарди, кои во овој напис ги нема.