[Рецензија: Докторка од Германија ја открива страшната вистина за мигрантите]

Текстот што е предмет на оваа рецензија, а е предлог на наш читател, не ги исполнува основните новинарски стандарди. Содржината на писмото, кое е пренесено во текстот, пак, е ксенофобична и поттикнува говор на омраза.

Линкуван наслов на анализираниот напис: Докторка од Германија ја открива страшната вистина за мигрантите

Датум и време на објавување: 23.11.2015

Датум на рецензирање: 27.11.2015

Рецензент: Ана Анастасовска

„Чешка докторка со отворено писмо го откри страшното искуство низ кое поминуваат таа и нејзините колеги во клиника во Минхен, каде што се примаат емигранти од целиот свет.“

Уште на почетокот на текстот се најавува страшното искуство на докторка која е вработена во клиника во Минхен, каде се примаат емигранти од цел свет. Она што недостига во овој напис, за тој да биде веродостоен, е изворот на веста од каде е преземен текстот. Понатаму, докторката и клиниката кои се спомнуваат се анонимни, што уште повеќе ја поткопува веродостојноста на написот, односно ваквата вест читателот не може да ја провери на ниту еден начин.

Меѓутоа, она што навистина боде очи е текстот на писмото кое, наводно, го напишала докторката од Германија.

„Полицијата ги чува клиниките, болниците и докторите, бидејќи тие луѓе се многу непредвидливи – пишува таа, додавајќи дека муслиманските и африканските имигранти се застрашувачко тешки луѓе со кои не е лесно да се работи.“

Со самото тоа што се нагласува дека станува збор за „муслимански и африкански имигранти“ кои биле многу непредвидливи, јасно е дека во написот има дискриминација на основа на верска и на национална основа.

„Писмото во скратена верзија беше прочитано на чешка телевизија. Во него докторката, која ја нарекоа „кодош од имигрантската криза“, предупреди дека емигрантите во Европа покрај СИДА и сифилис, со себе носат и многу егзотични болести, кои европските доктори не знаат како да ги третираат.“

На која чешка телевизија било прочитано писмото, нема одговор. Исто така, авторот на написот не нуди одговор на прашањето дали има некаде потврда за болестите кои овие луѓе ги носеле со себе и според тоа ги ширеле во Европа. Објавени ли се некаде статистички податоци што го потврдуваат тврдењето на докторката?

„Вчера имавме состанок овде во минхенската болница бидејќи ситуацијата е просто неиздржлива. Многу муслимани одбиваат лечење ако ги лечат жени, а ние жените одбиваме да одиме кај тие животни, посебно оние од Африка. Односот меѓу работниците и мигрантите многу се влошува, а од неодамна мигрантите низ болниците одат во придужба на полиција и полициски кучиња, па јасно ви е за што се работи. Многу од мигрантите имаат СИДА, сифилис и многу егзотични болести, кои ние никогаш не сме ги виделе во Европа, а ако случајно им препишеме лек на рецепт кој треба да се плати, тука доаѓа до тепачки, викање и насилство, особено ако се работи за лекови за деца.“

Ова е класичен пример за ширење говор на омраза, а таквиот говор може да се насети во целиот текст од писмото.

Овој текст е пример на новинарски напис кој има цел да пренесе една негативна порака и да создаде негативна слика за одредена група луѓе, односно, во овој случај, имигрантите од Африка и оние со муслиманска вероисповед, што е и особено акцентирано. Ваквиот напис шири ксенофобија и поттикнува говор на омраза, што е недозволиво во новинарството и што во нашето законодавство е кривично дело.

Имено, на овој начин е прекршен членот 10 од Кодексот на новинари во кој јасно е наведено дека:

Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…).