Напис: Остварен сонот на Албанците, премиер на Македонија е Албанец

 

Сонот на Албанците стана реалност. Македонија сега има премиер Албанец. Со оставката на поранешниот премиер Никола Груевски, де факто заменик премиерот на Македонија, Муса Џафери, станува премиер до именувањето на новиот премиер кој се очекува да биде именуван од редовите на ВМРО, генералниот секретар Емил Димитриев, известува „Тетова сот“.

 

И политичкиот аналитичар Џелал Незири рекол дека оставката на Груевски де факто подразбира дека Муса Џафери е премиер на Македонија?! „Ако Груевски дал оставка, дали сега де факто се подразбира дека Муса Џафери е премиер на Македонија?!“ пишува Незири.

 

Инаку вечерва премиерот Никола Груевски даде оставка, велејќи дека утре ќе ја достави својата оставка до претседателот на Собранието, Трајко Велјановски преку еден допис. /Тетова сот/

 

[Рецензија: „Остварен сонот на Албанците, премиер на Македонија е Албанец”]

Тешкотијата на новинарската работа се состои во тоа што независно од тоа што новинарот лично мисли или чувствува, тој треба да известува ладнокрвно и да се дистанцира од своите убедувања.

Линк до оригиналниот напис: Остварен сонот на албанците, премиер на Македонија е албанец

Датум и време на објавување: 14.01.2016

Датум на рецензирање: 18.01.2016

Рецензент: Агрон Врангала

Најевидентниот проблем во пишувањето вести и во известувањето е нијансата на коментирањето и субјективноста што им се дава на вестите. Овој проблем продолжува да биде присутен меѓу нашите информативни веб-страници, а и не само кај нив. Текстот земен како примерок е вистински пример за овој феномен. Тој е склон да ја пренесе инсинуацијата на новинарот кој можеби бил емотивен во моментот кога го напишал овој текст. Во секој случај, еден посветен новинар знае да се контролира себеси и тогаш кога однатре му зборува гласот на страста.

Еве неколку елементи што зборуваат за некоректноста на овој текст во однос на професионалните стандарди на пишување на вести:

Почнува со погрешна констатација кога вели дека „Сонот на Албанците стана реалност. Сега Македонија има премиер Албанец“. Ова не го рекол никој досега, едноставно е производ на шпекулацијата што може да кружи во јавноста, но ова не треба да влијае во избледувањето на точноста на веста.

Ова и законски не е точно. Бидејќи во моментот кога се повлекува премиерот, паѓа целата влада. Значи сите министри поднеле оставка. Во ниеден закон не е предвидено дека кога премиерот поднесува оставка, неговите задачи ги презема неговиот заменик. И кога имаме влада што поднела оставка, таа продолжува да ги врши задачите до избирањето нова влада.

Ако новинарот не ги знаел овие работи, требало да праша правни експерти.

Во меѓувреме, реченицата во која се зборува за поднесувањето оставка од страна на премиерот Груевски изгледа како да е точна, но не е. Реченицата гласи: „Вечерва премиерот Никола Груевски поднесе оставка велејќи дека утре ќе ја достави својата оставка до претседателот на Собранието…“, каде што има контрадикторност помеѓу „поднесе оставка“ и „ќе ја достави оставката“.

Мандатот на премиерот се смета дека завршува кога тоа ќе го одобри Собранието, институцијата што ја гласа оваа позиција.

Во етичкиот Кодекс на новинарите на Македонија пишува:

„Новинарите имаат право да имаат свои мислења, ставови и оценувања, но не смеат да ги камуфлираат нивните мислења како да се факти“.

Се знае дека во новинарството се работи крајно динамично, но временскиот притисок и обидот да се биде кохерентен со последната вест, не треба да влијае на тоа да има непрофесионализам.