Рецензија: Дали Пендаровски бара да се свитка кичмата за името како неговиот партиски лидер Заев?
Објавено во Рецензии
on 16 - 04 - 2014 Автор: Мирослава Симоновска
На самиот старт на овој исклучително пристрасен текст се тврди дека Пендаровски се залага за „личен консензус“ што е неточно пренесување на фактите. Од видео материјалот кој е составен дел од овој медиумски производ може да се слушне дека Пендаровски се залага за државен консензус. Покрај тоа, формулацијата „личен консензус“ е нелогична и не значи ништо.
Кандидатот за претседател на СДСМ, Стево Пендаровски не го открива својот став за прашањето за името, туку истакнува дека единствено се залагал за личен консензус и државен статус.
Линк до оригиналниот напис: Дали Пендаровски бара да се свитка кичмата за името како неговиот партиски лидер Заев?
Датум и време на објавување: 09.04.2014, 18:03
Датум на рецензирање: 12:04
Рецензент: Мирослава Бурнс
Во врска со насловот во кој се тврди дека партиски лидер на Пендаровски е Заев, важно е да се напомене дека ова не е вистина. Претседателскиот кандидат Стево Пендаровски во повеќе наврати посочува дека никогаш немал книшка од ниедна партија. Следствено, Заев не може да му биде партиски лидер на Пендаровски. Во врска со ставот за името, не е точно дека тој не го открива, бидејќи државниот консензус налага дека Пендаровски не може самиот да одлучува за името.
Во текстот претежно се коментира изјава на начин кој не соодветствува целосно со вистината, а притоа се нафрлени и низа неточни информации, селективно се фрагментираат податоци во функција на пристрасност кон еден од кандидатите, а за сметка на поврзување со грчките позиции на другиот кандидат. Ова се прави врз основа на коментирање и спинување, со фрејминг и со формулации кои навидум се општа вистина и не мора да се проверуваат, но ако се проверат се доаѓа до заклучок дека не се вистинити. На пример:
На ваквите негови изјави се надоврзуваат и грчките медиуми кои веќе објавија дека Пендаровски и СДСМ се посакуван партнер за разговорите за името.
Од погоренаведениот цитат, не е јасно кои грчки медиуми, не е јасен контекстот на наводните нивни објави, не е јасно дали тоа го сториле во информативен жанр или во мислење и колумна на поединци новинари итн. Едноставно, читателот не може да дојде до целосната вистина за тоа зошто е Пендаровски флексибилен. Не е прецизно кажано дека тоа не е официјален став на Грција. Напротив, се прави обид да се претстави како официјален став на Грција.
Од аспект на пристрасност, овој медиумски производ изобилува со формулации кои директно поставуваат еден од кандидатите во надредена позиција.
Наспроти нејасниот и неискажан став на Пендаровски, актуелниот и кандидат за втор претседателски мандат Ѓорге Иванов излезе со прецизен став по прашањето за името истакнувајќи дека за било кое решение ќе одлучуваат граѓаните на референдум.
Во насловот на овој мултимедијален производ се прави обид да се наведе читателот на впечаток дека едниот од кандидатите не е со цврсти позиции во врска со името, а дека ако победи другиот кандидат тогаш името на Македонија ќе биде безбедно. Ова се прави за чувствителна тема, без аргументи и неверодостојно.
Сѐ на сѐ, не е испочитувано начелото дека известувањето од изборите треба да биде избалансирано и непристрасно како што налага новинарскиот кодекс во членот 14:
Известувањето од политичките процеси, посебно од изборите треба да биде непристрасно и избалансирано.
Новинарот мора да обезбеди професионална дистанца од политичките субјекти.
Оваа рецензија е изработена во рамките на Проектот на УСАИД за зајакнување на медиумите во Македонија – Компонента Сервис за проверка на факти од медиумите, имплементирана од Метаморфозис. Рецензијата e овозможенa сo поддршка на Американската агенција за меѓународен развој (УСАИД). Содржината на рецензијата е одговорност на авторот и не ги одразува ставовите на Метаморфозис, УСАИД или Владата на САД. За повеќе информации за работата на УСАИД во Македонија, ве молиме посетете ги веб-страницата (http://macedonia.usaid.gov) и Фејсбук-страницата на УСАИД (www.facebook.com/USAIDMacedonia).
ИНФОГРАФИК
ВИСТИНИТОСТ
нема факти
неточни наводи
неверодостојни наводи
ИЗВОРИ НА ИНФОРМАЦИИ
има евидентирани извори
анонимни
нерелевантни
1 извор
еднострани
СЕОПФАТНОСТ
несеопфатнo
прикриени информации
ПРИСТРАСНОСТ
не може да се утврди
извртување на вистина (спин)
лажни информации
наклонетост
политичка пристрасност
КОМЕНТИРАЊЕ
има коментаторски елементи
интегрирано со фактите
ПЛАГИЈАТ
не може да се одреди
ненаведен автор, ненаведен извор
КВАЛИТЕТ НА НАСЛОВОТ
дезинформира
некреативен
сензационален
несоодветен
тенденциозен
ФОТОГРАФИЈА
има
несоодветна
манипулира
ненаведен автор(извор)
ГОВОР НА ОМРАЗА
нема навредлив говор
нема говор на омраза
не потикнува на насилство
не дискриминира
УРЕДЕН ЗА ВЕБ
читлив
солидни мултимедијални елементи
нема контекстуални линкови
делумно стилски уреден
неповрзан со тагови